Bas bostandyǵynan aıyrý oryndarynda otyrǵandardyń 49 paıyzy buryn sottalǵandar
ASTANA. 25 qańtar. QazAqparat /Qanat Mámetqazyuly/ - Qazaqstanda búgingi kúni bas bostandyǵynan aıyrý oryndarynda otyrǵandardyń 49 paıyzy buryn sottalǵandar bolyp tabylady.
Búgin jańadan júzege asyp jatqan «Azamattyq qoǵam men memlekettiń birikken kúsh-jigerimen jazasyn óteýden bosatylǵan azamattardy áleýmettik beıimdeý jáne olardyń quqyqtaryn qorǵaý» atty jańa jobaǵa baılanysty baspasóz máslıhatynda Halyqaralyq túrme reformasy Ókildiginiń dırektory Sáýle Mektepbaeva osylaı málimdedi.
Ókildik basshysynyń aıtýynsha, elimiz úshin jańa jobanyń júzege asýy asa ózekti. Óıtkeni, búgingi tańda Qazaqstanda penıtentsıarlyq mekemelerden bosatylǵandardyń sany men olardyń atalǵan mekemege qaıta «oralýynyń» kórsetkishi zor. «Statıstıkaǵa súıensek, 2010 jyly qazaqstandyq penıtentsıarlyq mekemelerden 18 myń 898 adam bosatyldy. Al 2011 jyly bas bostandyǵynan aıyrý oryndarynan 15 myń 185 adam shyqqan. Bunyń ózi bas bostandyǵynan aıyrý oryndaryna túsýshiler men olardyń «aınalymynyń» kórsetkishi de joǵary ekenin bildiredi. Endeshe ondaı azamattarmen jumys isteýimiz kerek. Toqtala ketetin taǵy bir jaıt, qazir qamaý oryndarynda otyrǵan azamattardyń 49 paıyzy buryn sotty bolǵandar», - deıdi S. Mektepbaeva. Onyń aıtýynsha, buryn sottalǵandardyń basym bóligi ózderiniń qoǵamdaǵy ornyn taba almaýshylyqtan túrmelerge qaıta oralyp jatady.
