Bas bostandyǵy shektelgenderge «elektrondy bilezikter» kıgizý josparlanady
ASTANA. 24 maýsym. QazAqparat - Elimizde bas bostandyǵy shektelgenderge «elektrondy bilezikter» kıgizý josparlanady. Bul týraly búgin elordada QR Prezıdenti janyndaǵy Ortalyq kommýnıkatsııalar qyzmetindegi brıfıng barysynda Іshki ister mınıstri Qalmuhanbet Qasymov málim etti.
«Bas bostandyǵy shekteýli túrde jazasyn óteýshi tulǵalardy, sondaı-aq qylmystyq-atqarý júıesi ınspektsııasynyń tirkeýinde turǵandardy qadaǵalaýdy júzege asyrý kezinde paıdalanylatyn «elektrondy bilezikter» dep atalatyn izge túsýdiń elektrondy quralyn engizý josparlanyp otyr. Bul atalǵan sanattaǵy tulǵalarǵa baqylaýdy kúsheıtýge, ýaqytyly olardyń turǵan jerin anyqtaýǵa, jazasyn óteýdiń bekitilgen tártibinen jaltarýdy toqtatýǵa, sondaı-aq eskertýge múmkindik beredi», - deıdi Q. Qasymov.
Budan bólek, mınıstr qylmystyq-atqarý júıesinde atqarylatyn sharalarǵa da toqtalyp ótti. Onyń aıtýynsha, búgingi tańda elimizdegi qylmystyq-atqarý júıesiniń mekemeleriniń basym bóligi paıdalaný merzimin 40 jyldan 80 jylǵa deıin ótkergen, apatty jaǵdaıda. «Sońǵy on jylda elimizde birde-bir túzetý mekemesi salynbaǵan», - dedi Q. Qasymov.
