Bas bapker qazaq boksshylaryn alda qandaı jarystar kútip turǵanyn aıtty

ASTANA. KAZINFORM - Bokstan Qazaqstan ulttyq quramasynyń bas bapkeri Myrzaǵalı Aıtjanov shákirtterin alda qandaı mańyzdy jarystar kútip turǵanyn aıtyp berdi.

«Ulttyq qurama búgingi tańda Astanada oqý-jattyǵý jıyndaryn ótkizip jatyr. 13-18 mamyr aralyǵynda bas qalamyzda dástúrli halyqaralyq «Elorda kýbogi» ótedi. Oǵan ulttyq quramadaǵy barlyq boksshylar qatysady. Daıyndyǵymyz oıdaǵydaı, belgilengen keste boıynsha ótip jatyr», dedi bas bapker.

Sondaı-aq, Olımpıada oıyndaryna tolyq quramda barýǵa bar kúsh-jigerin salyp jatqanyn da atap ótti.

«Ózderińiz bilesizder, Italııada ótken lıtsenzııalyq týrnırde bes salmaqta joldama jeńip aldyq. Ókinishke qaraı bizde qazir 63,5 keli salmaqta ǵana joldama joq. Endi bokstan Parıj Olımpıadasynyń joldamalary sarapqa salynatyn sońǵy álemdik lıtsenzııalyq týrnır mamyrdyń 23-i – maýsymnyń 5-i kúnderi aralyǵynda Taılandtyń bas shahary Bangkokta ótedi. Atalǵan salmaqta Muhammedsabyr Bazarbaıuly joldamaǵa talasady. Buıyrsa, bul synda Bazarbaıuly joldamaǵa qol jetkizedi dep oılaımyn. Bul sońǵy múmkindik», - Myrzaǵalı Aıtjanov.

Esterińizge sala keteıik, osyǵan deıin bokstan Astanada ótken Azııa chempıonatynda 22 jasqa deıingi boksshylarymyz 24 medal jeńip alyp, jalpy komandalyq esepte kósh bastaǵanyn jazǵan bolatynbyz.