Bas bapker fýtboldan Qazaqstan quramasynyń jeńisine qatysty pikir bildirdi
ASTANA. QazAqparat - Fýtboldan UEFA Ulttar lıgasynyń V dıvızıonyna joldama alǵan Qazaqstan quramasynyń bas bapkeri Magomed Adıev buǵan baılanysty pikirin bildirdi, dep habarlaıdy QazAqparat tilshisi.
Eske salsaq, el quramasy 22 qyrkúıekte óz alańynda Belarýsti súrindirdi.
Atalǵan jeńisten keıin Qazaqstan Prezıdenti Qasym-Jomart Toqaev quttyqtaý jedelhatyn joldady.
Osylaısha qazaqstandyq fýtbolshylar bir týryn buryn V dıvızıonyna berilgen joldamaǵa ıe boldy.
«Búgingi jeńis ońaılyqpen kelgen joq. Oǵan jankúıerler de úlken úles qosty. Elimizdiń barlyq óńirine barǵanda halyqtyń qurama oıyndaryna rızashylyǵyn baıqadym. Sondyqtan barsha jankúıerlerge alǵys aıtamyn. Olardyń tarapynan búgingi oıynda da qoldaý erekshe boldy. Jankúıerler stadıonǵa kóp jınaldy. Jankúıerlerdiń úlken qoldaýy ekinshi goldyń soǵylýyna tikeleı áser etti. Fýtbolshylar kezdesý sońyna deıin qarqynyn báseńdetken joq», - dedi Magomed Adıev.
Sondaı-aq, Belarýs quramasynyń bas bapkeri Georgıı Kondratev Qazaqstan fýtbolshylarynyń jeńisin joǵary baǵalap, lebizin bildirdi.
«Qazaqstandyq fýtbolshylardy búgingi jeńis arqyly V dıvızıonyna joldama alýymen quttyqtaımyn. Olardyń atalǵan kezdesýge óte jaqsy daıyndalǵany baıqaldy. Shabýylǵa kóbirek shyǵyp, qarqyndy oıyn kórsetti. Kezdesý barysynda shákirtterim qarsylastarymen ózara báseke barysynda óreskel qatelikterge jol berdi. Ekinshi kezeńde olardyń tarapynan jınaqy qımyl kóre alǵan joqpyn. Qazir qaı elde de fýtbol damyp jatyr. Sol sebepti sizderdiń quramalaryńyz bul baǵytta durys jolda kele jatyr dep esepteımin», - dedi ol.
