Bas-aıaǵy 238: Bas prokýratýra qańtarda qaza tapqandar sanyn qaıta eske saldy

ASTANA. QazAqparat – QR Bas prokýratýrasy qańtardaǵy jappaı tártipsizdik kezinde qaıtys bolǵan azamattardyń naqty sanyn jarııa etti, dep habarlaıdy QazAqparat tilshisi.

«Áleýmettik jelilerde qańtar oqıǵasynda qaza bolǵan azamattardyń sanyna senimsizdik tanytqan jazbalar jarııalandy. Jappaı tártipsizdik kezinde 238 azamat qaıtys boldy dep resmı túrde málimdeımiz. Árbir ólim faktisi boıynsha tergeý organdary sotqa deıingi isti tirkedi. Qaza tapqandar týraly bizdiń derek senimdi, júrgizilgen sotqa deıingi tergep-tekserý sheńberinde qaıta tekserildi. Osy oraıda jalǵan aqparat taratqandarǵa jaýapkershilik baryn eske salamyn», - dedi QR Bas prokýratýrasy 1 qyzmet bastyǵynyń orynbasary Eldos Qılymjanov OKQ-de ótken brıfıngte.

Sondaı-aq, atalǵan vedomstvo ókili adam shyǵynynan bólek, nysandar men mekemelerge zalal kelgenin aıtty.

«Jappaı tártipsizdikter bolǵan qalalarda 1 466 ǵımarat pen mekeme qırady. Onyń ishinde 1 395 bıznes nysany jáne 71 memlekettik mekeme. Aıtar bolsaq, 5 qańtar saǵat 6.00-den 23.00 aralyǵynda Almatyda qala ákimdigine, rezıdentsııaǵa, áýejaıǵa, «Habar», «Qazaqstan», «Mır 24» telearnalarynyń keńselerine shabýyl jasaldy. Sonymen qatar quqyqtyq statıstıka jáne arnaıy esepke alý komıtetiniń basqarmasy ǵımaraty qıratyldy», - deıdi ol.

Buǵan deıin habarlaǵanymyzdaı, qańtar oqıǵasyna qatysqan 1 myńnan astam adamǵa raqymshylyq jasaldy.