Bas aýrýyn elemeý ınsýltqa ákelýi múmkin – nevrolog eskertedi
ASTANA. KAZINFORM — Bas aýrýyn eleýsiz qaldyrýǵa bolmaıdy. Sebebi, onyń sońy ınsýltqa ulasýy múmkin. Bul týraly «Búgin LIVE» baǵdarlamasyna bergen suhbatynda nevrolog maman málimdedi.
– Bas aýrýy 100 paıyz adamdardyń bárinde kezdesedi. Biraq ol jedel jáne sozylmaly bolyp ekige bólinedi. Jedel bas aýrýynda adam medıtsınalyq kómekke júgingeni durys. Jedel bas aýrýy kezinde aýyrsynýdy basatyn dárini iship jata beremin degen bolmaıdy. Ol ınsýlttiń ne jedel qan-tamyr aýrýlarynyń belgisi bolýy da múmkin, - deıdi Dınara Júsipova.
Maman sozylmaly bas aýrýlaryna da toqtaldy.
– Sozylmaly bas aýrýy barlyq adamda kezdesedi. Sharshaǵan kezde, tipti keı adamdarda tańerteń uıqysynan oıanǵanda da basy aýyryp turady. Jalpy adam uıqydan turǵan kezde bas aýrýy qalypty emes. Óıtkeni adam tynyǵyp turdy, júıke júıesi tynyq bolýy kerek. Bas aýyrsa, demek onda bir patologııa bar degen sóz. Sol úshin mundaı jaǵdaıda dárigerge kóringen durys. Bas aýrýdyń taǵy bir túri – bulshyqetpen baılanysty. Kompıýterdiń aldynda, keńsede otyryp kóp jumys isteıtinderde bas aýrýlary jıi kezdesedi. Olardyń bulshyqetteriniń bári qysylyp, bas aýrýyna ákelýi múmkin. Onyń emi tek dárigermen ǵana basylady. Óıtkeni ondaı naýqastar 2-3 aıǵa deıin uzaq em qabyldaýy múmkin, - deıdi spıker.
Nevrolog bas saqınasy jıi ustaıtyn naýqastarǵa eskertý jasady.
– Odan keıin mıgren, qazaqsha bas saqınasy degen aýrý bar. Adamnyń oǵan shydaýy múmkin emes. Ol jerde aýyrsynýdy basatyn dáriler kómektespeıdi. Naqty dıagnoz qoıý úshin de uzaq merzimdi tekseristen ótý kerek. Bul aýrýǵa beı-jaı qarap jata berýge bolmaıdy. Úshinshi kezekte bas aýrýy omyrtqaǵa baılanysty da bolýy múmkin. Osteohondroz, protrýzııa, gryja bolýy múmkin. Adamnyń júıkesi qatty sharshaǵan kezde bas aýyrady, - deıdi ol.
Dınara Júsipova bas aýrýynyń saldary depressııaǵa ulasýy múmkin ekenin aıtty.
– Bas aýrýynyń taǵy bir jaman qasıeti: eger adamnyń basy 2-3 kún aýyrsa, ol qaıtadan bas aýrýǵa alyp keledi. ıAǵnı óz-ózine bas aýrýdy qaıtalap shaqyra bastaıdy. Mundaıda nevrologtar mıǵa áser etetin dári berip, bas aýrýdy toqtatýǵa áreket etemiz. Mundaı aýrýlardyń arty eń birinshi kezekte sozylmaly depressııaǵa alyp barýy múmkin. Ekinshi kezekte emotsıonaldy buzylysqa dýshar bolýy múmkin. Adam ashýlanshaq bolady, jumys kezinde kontsentratsııasy bolmaıdy, umytshaq bola bastaıdy jáne jan-jaǵyna patologııalyq minezi kórine bastaıdy, - deıdi maman.
Eske sala keteıik, buǵan deıin jastar arasynda jańa sındrom paıda bolǵanyn jazǵan edik.
.