Bas áskerı prokýror Úkimet janynan áskerı-patrıottyq tárbıe ortalyǵyn ashýdy usyndy
ASTANA. 28 qarash. QazAQparat - Qazaqstannyń Bas áskerı prokýrory Erǵalı Merzadınov ókiletti organdarǵa Úkimet janynan Áskerı-patrıottyq tárbıe ortalyǵyn ashýdyń qajettiligin zerttep-zerdeleýdi usyndy. Bul týraly vedomstvonyń baspasóz qyzmeti habarlady.
Mundaı oıdy ol búgin ótken áskerı basqarý jáne qylmystyq qýdalaý organdary Úılestirý keńesiniń jáne Bas áskerı prokýratýranyń janyndaǵy Qoǵamdyq keńestiń birlesken otyrysy barysynda aıtty.
Birlesken otyrysty ashqan Erǵalı Merzadınov QR Qarýly Kúshteri, basqa áskerleri men áskerı quralymdarynyń ımıdjdik saıasatyn júzege asyrýdyń jáne sybaılas jemqorlyqqa qarsy profılaktıkalyq sharalardyń jetkiliksizdigi jaǵdaıynda, osyndaı formattaǵy otyrystardyń mańyzdylyǵy zor ekendigin atap ótti.
Bas áskerı prokýror óz sózinde áskerı vedomstvolardyń buqaralyq aqparat quraldarymen qarym-qatynasynyń jekelegen máselelerine toqtaldy, vedomstvolyq baspasózdi oqýǵa degen qyzyǵýshylyqtyń azaıǵanyn, sondaı-aq ýákiletti organdardyń jumysyndaǵy shaqyrylymǵa deıingi jastarmen jumysty uıymdastyrýdaǵy eleýli kemshilikterdi tilge tıek etti.
Bas áskerı prokýrordyń pikirinshe, áskerdiń ımıdjin kóterý úshin Qarýly kúshterdi nasıhattaýdyń keshendi baǵdarlamasyn engizý kerek. Onyń aıtýynsha áskerı-patrıottyq gazetterdiń rebrendıngi mańyzdy. Vedomstvolyq saıttardyń jumysy jetildirýdi qajet etedi.
E. Merzadınovtiń oıynsha, ıdeologııalyq ekstremızmge qarsy turý úshin jalpy áskerı-patrıottyq blokqa budan ári birigýi jáne memleket tarapynan qoldaý qajet. Osy rette, Bas áskerı prokýror ýákiletti organdarǵa Úkimettiń janyndaǵy áskerı-patrıottyq tárbıeleý Ortalyǵyn ashýdy, alǵashqy áskerı daıyndyq sabaqtarynyń saǵat sanyn kóbeıtýdi, áskerı-qoldanbaly sport túrlerin jáne áskerı-sporttyq ınfraqurylymnyń nysandaryn damytý usyndy.
Osy suraqtardy talqylaý barysynda jıynǵa qatysýshylardyń birqatar bastamalary qaralyp, qoldaý tapty.
Sybaılas jemqorlyq qylmystaryn ashý jáne tergeýdiń, olardyń aldyn-alý jáne profılaktıka jasaý sharalarynyń tıimdiligi zańdylyǵynyń jaı-kúıi jiti taldandy.
Otyrysqa qatysýshylar memlekettik satyp alý jáne Memlekettik shekarany qorǵaý salalaryndaǵy sybaılas jemqorlyqpen kúresti, onyń ishinde jańa tehnologııalardy damytý jolymen kúsheıtý qajettigi týraly pikirmen biraýyzdan kelisti.
