Bas áskerı prokýratýranyń keńeıtilgen alqa májilisi ótti
ASTANA. 19 shilde. QazAqparat /Qanat Mámetqazyuly/ - Astanada Bas áskerı prokýror Erǵalı Merzadınovtyń tóraǵalyǵymen, aımaqtyq jáne garnızondyq áskerı prokýrorlardyń qatysýymen Bas áskerı prokýratýranyń keńeıtilgen alqa jınalysy ótti.
«Shara barysynda áskerı prokýrorlar, áskerı qyzmetshiler men olardyń otbasy músheleriniń konstıtýtsııalyq jáne áleýmettik quqyqtarynyń saqtalýyn qamtamasyz etý, áskerı basqarý jáne qylmystyq qýdalaý organdarynyń quqyqbuzýshylyq pen áskerı ortadaǵy sybaılas jemqorlyqtyń aldyn alýdaǵy is-sharalaryn úılestirýdegi ótkizgen jumystary jaıly esep berdi. Bas áskerı prokýror, baǵynysyndaǵy qyzmetkerlerden áskerı qyzmetshilerdiń ómiri men densaýlyǵyn saqtaýǵa baǵyttalǵan zańnamalardyn oryndalýyna qatań qadaǵalaýdy qamtamasyz etýge nazar aýdardy. Sonymen qatar, áskerı qyzmetshilerdiń opat bolýy jáne jaraqat alýy máselelerin udaıy túrde taldap, onyń aldyn alýǵa qajetti sharalar qoldanýdy talap etti. Sybaılas jemqorlyq faktilerin jáne laýazymdyq quqyqbuzýshylyqty anyqtap, jolyn kesý máselelerine erekshe kóńil aýdarýǵa shaqyrdy», - delingen baspasóz aıǵaǵynda.
Sonymen qatar, basqosý barysynda áskerı prokýrorlarǵa memlekettik shekara, turǵyn-úı jáne tabıǵatty qorǵaý zańnamalarynyń oryndalýyna qadaǵalaý jumystaryn kúsheıtý júkteldi. Ekonomıka salasynda, onyń ishinde memlekettik satyp alýdy ótkizý kezinde, qadaǵalaý ádisterimen memlekettik bıýdjettiń qarajatynyń maqsatty jáne zańdy túrde paıdalanylýyna yqpal etý sharalaryna nazar aýdaryldy. Prokýrorlyq qadaǵalaý sharalarymen kinálilerdi memleketke keltirilgen materıaldyq shyǵyndy óteýge májbirleý qajettigi eske salyndy.
Sonymen qatar, jıyn barysynda Qazaqstan Respýblıkasy Qarýly Kúshteri, basqa da áskerleri men áskerı quralymdaryndaǵy lańkestik pen ekstremızmge qarsy áreket máseleleri de qaraldy.
