Bas áskerı prokýratýra: Janseıit Túımebaevtyń ulyn óltirgen kúdikti – áskerı qyzmetshi

ASTANA. QazAqparat – Qańtardaǵy jappaı tártipsizdik kezinde ál-Farabı atyndaǵy Qazaq ulttyq ýnıversıtetiniń rektory Janseıit Túımebaevtyń ulyn óltirdi degen kúdikpen qamaýǵa alynǵan áskerı adam bolyp shyqty, dep habarlaıdy QazAqparat tilshisi bas áskerı prokýratýrasynyń baspasóz qyzmetine silteme jasap.

«7 qańtarda K. esimdi azamattyń qaıtys bolý faktisi boıynsha Bas áskerı prokýratýranyń jedel toby tergeý júrgizdi. Joǵarydaǵy fakt boıynsha Qorǵanys mınıstrligi áskerı bólimderiniń biriniń áskerı qyzmetshisi Qylmystyq kodekstiń 451-babynyń 2-bóligi 1-tarmaǵymen (aýyr zardaptarǵa ákep soqqan bılikti asyra paıdalaný) kúdikti dep tanyldy. Ol qamaýǵa alynǵan», - delingen resmı habarlamada.

Aqparatta aıtylǵandaı, qazir qylmystyq protseske qatysýshylar atalǵan ispen tanysyp jatyr.

«Kúdiktiniń kinásin sot anyqtaıdy. Tergeý múddesi úshin ózge aqparat jarııalanbaıdy», - deıdi vedomstvodan.

Aıta ketsek, keshe elimizdiń bas prokýratýrasy qańtar oqıǵasy kezinde Janseıit Túımebaevtiń ulynyń ólimi boıynsha kúdikti ustalǵanyn habarlaǵan edi.

Eske salsaq, Janseıit Túımebaevtiń uly bıylǵy qańtardaǵy jappaı tártipsizdik kezinde belgisiz bireýler qolynan qaza tapqany habarlanǵan edi.