Bas áskerı prokýratýra Arys apatynyń yqtımal sebepterin atady
QR Bas áskerı prokýrordyń orynbasary Darhan Erjanovtyń aıtýyna qaraǵanda, atalmysh tótenshe oqıǵa boıynsha Qylmystyq kodekstiń 462 babynyń 3 bólimen sotqa deıingi tergeý júrip jatyr. Búginge deıin 100 adamnan jaýap alynǵan.
«Atalmysh bap qarý-jaraqpen, aınalaǵa qaýip tóndiretin zattarmen jumys isteý qaǵıdalaryn buzý faktilerin qamtıdy. Abaısyzdyq saldarynda 2 nemese odan da kóp adamnyń ólimi tirkelse, jaýapty tulǵalardy 5-ten 10 jylǵa deıin bas bostandyǵynan aıyrý jazasy qarastyrylǵan», - dedi áskerı prokýratýra ókili.
QR Bas áskerı prokýrordyń aǵa kómekshisi Erkin Qoja-Ahmettiń aıtýynsha áskerı qoıma jarylysyna birneshe jaıt sebep bolýy múmkin.
«Arys qalasyndaǵy №44859 áskerı bólimniń oq-dáriler qoımasyndaǵy jarylystyń sebebi retinde kóptegen faktorlar qaralyp jatyr. Sonyń ishinde órtke qarsy qaýipsizdik erejeleriniń saqtalmaýy, laýazymdy tulǵalardyń salǵyrttyǵy sııaqty nusqalar zerttelýde. Oq-dáriler saqtalatyn qoımalardyń qaýipsizdigin saqtaýǵa bólingen bıýdjettik qarajattyń utymdy paıdalanylýy, jarylǵysh zattardyń durys jınalýy tekserilýde. Qoımalarda anyqtalǵan buzýshylyqtardyń ýaqtyly joıylǵany, al joımaǵan bolsa, áskerı qyzmetshilerdiń áreketsizdigi jaıly is qaralady. Tergeý kezinde jaýapty tulǵalardyń is-áreketterine quqyqtyq baǵa beriletin bolady. Joǵaryda atalǵan saralaý men nusqalar aldyn ala boljam ekenin aıta ketý kerek», - dedi ol.
Bas áskerı prokýratýra ókilderiniń aıtýynsha, atalmysh tekserýdi Іshki ister mınıstrliginiń tájirıbeli mamandary júrgizetin bolady. Tergeýge jaýapty organdardyń jumysyn tıimdi úılestirý maqsatynda áskerı jáne aýmaqtyq prokýratýra ókilderi tartylǵan.
Aıta ketsek, QR Tótenshe jaǵdaılar komıtetiniń tóraǵasy Vladımır Bekker Arystaǵy apattyń shyǵyn kólemin shamamen 20 mlrd teńge dep baǵalaǵan bolatyn.
Qazir Arys arqyly júretin jolaýshylar poıyzdarynyń júrý kestesi tolyq qalpyna keltirilgen.
Túrkistan oblysy ákiminiń tapsyrmasymen Arystaǵy kásipkerler 2020 jylǵa deıin salyqtan bosatylyp otyr.
