Bas áskerı prokýratýra Arys apaty týraly: Ázirge naqty kúdikti joq

NUR-SULTAN. QazAqparat - Ortalyq kommýnıkatsııalar qyzmetinde ótken brıfıngte QR Bas áskerı prokýratýrasynyń ókilderi Arystaǵy jarylysqa kinálilerdi anyqtaý qansha ýaqytqa sozylatynyn aıtty, dep habarlaıdy QazAqparat tilshisi.

Bas áskerı prokýrordyń orynbasary Darhan Erjanovtyń aıtýynsha, jarylysqa kináli retinde kúdiktilerdi ataýǵa áli erte.

«Áýeli tergeý jospary qurylǵan bolatyn. Sol josparǵa saı eki baǵyt boıynsha jumys júrip jatyr. Birinshi kezeńde oqıǵa ornyn zertteý arqyly tótenshe oqıǵanyń sebebin anyqtaýǵa kúsh salynady. Áskerı qoımanyń jumysyna qatysty qujattardyń bárin kóterip jatyrmyz. Osy kezeńde búginge deıin 100-den astam adamnan jaýap aldyq. Ázirge kúdiktiler týraly aıtýǵa erte. Mamandar qazir apat kezindegi dálelder men aıǵaq zattardy tirkep jatyr», - dedi áskerı prokýratýra ókili.

Bas áskerı prokýrordyń orynbasary tergeý jumystarynyń 2-5 aı kóleminde júretinin aıtady.

«Qylmystyq protsessýaldyq zańnamaǵa sáıkes mundaı tekserýler 2 aı kóleminde júrýi tıis. Eger osy ýaqyt ishinde jetkilikti dálelder jınalmasa, qylmystyq is 4-5 aıǵa deıin sozylýy múmkin», - dedi Darhan Erjanov.

Aıta ketsek, QR Tótenshe jaǵdaılar komıtetiniń tóraǵasy Vladımır Bekker Arystaǵy apattyń shyǵyn kólemin shamamen 20 mlrd teńge dep baǵalaǵan bolatyn.

Qazir Arys arqyly júretin jolaýshylar poıyzdarynyń júrý kestesi tolyq qalpyna keltirilgen.

Túrkistan oblysy ákiminiń tapsyrmasymen Arystaǵy kásipkerler 2020 jylǵa deıin salyqtan bosatylyp otyr.