«Barystyń» oqý-jattyǵý jıyndary Dýbaıda ótedi - V.Krıkýnov
ASTANA. 8 jeltoqsan. QazAqparat - 19 jeltoqsanǵa deıin Birikken Arab Ámirlikterinde astanalyq «Barys» hokkeı klýbynyń oqý-jattyǵý jıyndary ótedi.
Bul týraly keshegi matchtan keıin «Astana» telearnasyna suhbat bergen komandanyń bapkeri Vladımır Krıkýnov málim etti.
Onyń aıtýynsha, osy ýaqyt aralyǵynda Eýrohokkeıtýry ótedi. «Barystyń» bir top hokkeıshileri sol jarystarǵa qatysady. Al qalǵany Dýbaıǵa baryp, oqý-jattyǵý jıyndaryn ótkizetin bolady», - deıdi V.Krıkýnov.
Onyń aıtýynsha, Birikken Arab Ámirlikterinde oqý-jattyǵý jıyndary úshin barlyq jaǵdaı jasalǵan. Oǵan qosa, hokkeıshiler psıhologııalyq jaǵynan tynyǵa alady.
Esterińize sala keteıik, keshe «Barystyń» jigitteri «Dınamo» (Mınsk) komandasynyń tas-talqanyn shyǵaryp, 7:2 esebimen jeńiske jetken bolatyn. Kelesi kezdesý syrt alańda 19 jeltoqsan kúni ótedi - «Barys» Rıganyń «Dınamosymen» kúsh synasyp kóredi.
