«Barystyń» kapıtany QHL juldyzdarynyń qataryna kirdi
NUR-SULTAN. QazAqparat – Qurlyqtyq hokkeı lıgasy (QHL) 2020 jylǵy juldyzdar matchyna qatysatyndar tizimin jarııa etti, dep habarlaıdy QazAqparat tilshisi.
«Barys» hokkeı klýby málim etkenindeı, Máskeýde 18-19 qańtarda ótetin jyldyń basty shoýyna QHL-dyń 24 klýbynda oınaıtyn 40 oıynshy attanbaqshy.
Solardyń ishinde «Barystyń» kapıtany, Qazaqstan quramasynyń qorǵaýshysy, tegi kanadalyq Darren Dıts bar. Ol «Avangard» hokkeı klýbynyń bas bapkeri Bob Hartlı basshylyq etetin Chernyshev dıvızıonynyń namysyn qorǵaıdy.
QHL juldyzdaryn tańdaý úsh kezeńde júrgizildi. Aldymen olardy jankúıerler, sodan keıin BAQ ókilderi tańdady. Sońǵy 16 hokkeıshini QHL iriktedi. Match qarsańynda komandalar MHL shaqyrý kýbogynyń tórt úzdik oıynshysymen tolyǵatyn bolady.
Tórt dıvızıon quramalary 18 qańtar kúni sheberlik shoýyn ótkizedi. Al 19 qańtarda matchtyń ózi shaǵyn týrnır túrinde ótedi.
Eske sala keteıik, budan buryn «Barystyń» SKA komandasynan utylǵanyn jazǵan edik.
Andreı Skabelkanyń shákirtteri erteń Máskeýdiń «Dınamosyn» qabyldaıdy.
Keshe «Dınamo» Máskeýde TsSKA komandasyn 3:0 esebimen utyp ketti. Bul «Dınamonyń» chempıonattaǵy eki myńynshy jeńisi edi.
«Dınamo» 53 upaımen QHL-dyń jalpy kestesinde besinshi, Batys konferentsııasynda úshinshi orynda keledi. Shyǵys konferentsııada tórtinshi orynda turǵan «Barystyń» odan úsh upaıy kem.
