«Barystyń» qalqany Eremeev 67 oıynda óz qaqpasyna gol jibergen joq
ASTANA. 12 jeltoqsan. QazAqparat - Jeltoqsannyń basynda «Barys» klýby Qurlyqtyq hokkeı lıgasy aıasyndaǵy kezekti kezdesýinde «Severstal» komandasyn 3:0 esebimen jeńdi.
Bul oıynda astanalyq klýbtyń qaqpasyn Vıtalıı Eremeev qorǵap, qonaqtardyń birde-bir soqqysyn darytqan joq. Sóıtip, óz qaqpasyn «qurǵaq» saqtap, «Barys» jeńiske jetti. Bul - Eremeevtiń sporttyq karerasyndaǵy QHL men oǵan deıingi Reseı chempıonattaryn qosa eseptegende 67-ret óz qaqpasyna gol jibermeı, oıyndy «nólmen» aıaqtaýy. Ázirshe 67 oıynda óz qaqpasyna birde-bir gol jibermeı, «qurǵaq» saqtap qalǵan eshkim joq, dep jazady «Alash aınasy» basylymy.
Eremeev qazir 37-den asty. Sondyqtan bıylǵy maýsymda bapkerler oǵan kóp kúsh salmaı júr. Tájirıbeli qaqpashyny Qazaqstan ulttyq quramasynyń aldaǵy mańyzdy oıyndaryna saqtap júrgen de bolar.
Jaqynda Qurlyqtyq hokkeı lıgasy Eremeevtiń osy eren jetistigine toqtalyp ótip, odan keıingi oryndaǵy eki qaqpashynyń kórsetkishterin de jarııalady. Aleksandr Eremenko men Vasılıı Koshechkın ázirshe 46 oıyndy «nólmen» aıaqtap, óz qaqpalaryna gol jibermegen eken. Árıne, ekeýi de Eremeevten birshama qalyp qoıǵan. Biraq Eremenko Qazaqstan quramasynyń qaqpashysynan bes jas kishi bolsa, Koshechkın segiz jas kishi.
