«Barystyń» búgingi qarsylasy - «Traktor»
ASTANA. 3 jeltoqsan. QazAqparat - Búgin Astana qalasynyń «Barys» hokkeı klýby syrt alańda «Traktor» (Reseı, Chelıabi) komandasymen oınaıdy.
Qurlyqtyq hokkeı lıgasy aıasynda eki komanda talaı ret kezdesken. Sol matchtardyń basym bóliginde «Traktordyń» mereıi ústem boldy. Jalpy, osy ýaqytqa deıin «Barys» pen «Traktor» 18 ret bir-birine qarsy oınaǵan. Sonyń 11 matchy Chelıabi quramasynyń paıdasyna sheshilgen. Bıylǵy chempıonat aıasynda ótken alǵashqy kezdesýde de «Barys» óz qarsylasynan 1:5 esebimen utyldy. Al qazirgi jalpytýrnırlik kestede Astana qalasynyń hokkeı klýby «Traktorǵa» qaraǵanda, oq boıy ozyq keledi. «Barys» 32 matchta 64 upaı jınap, 4-orynǵa shyqsa, «Traktor» 31 oıynnan keıin tek 44 upaıǵa ǵana qol jetkizgen. Bul komanda 17-orynda tur.
Aıta keteıik, búgingi oıyn Astana ýaqyty boıynsha keshki saǵat 19:00-de bastalady. Ony «KAZsport» telearnasy tikeleı efır arqyly kórsetedi.
