«Barystyń» búgingi qarsylasy - «Lev»
ASTANA. 28 qarasha. QazAqparat - Búgin «Barys» hokkeı klýby óz alańynda «Lev» (Chehııa, Praga) komandasyn qabyldaıdy.
Praga hokeı klýbynyń Qurlyqtyq hokkeı lıgasyna qosylǵanyna kóp bolǵan joq. Sondyqtan osy ýaqytqa deıin bul eki komanda úsh-aq ret kezdesti. Sonyń barlyǵynda «Barystyń» mereıi ústem boldy. Ótken chempıonattyń eki matchynda Astana qalasynyń hokkeı klýby 4:2 jáne 5:1 esebimen jeńiske jetse, bıylǵy chempıonat aıasynda ótken sońǵy oıynda «Barystyń» hokkeıshileri tek overtaımda ǵana jeńiske jetti. Ol kezde esep aıyrmasy bir-aq shaıbany (3:2) quraǵan. Soǵan qaraǵanda, «Arystannyń» bıylǵy qarqyny jaman emes.
Aıta keteıik, búgingi oıyn keshki saǵat 19:00-de Astanadaǵy «Qazaqstan» sport kesheninde bastalady. Ony «KAZsport» telearnasy tikeleı efır arqyly kórsetpek.
