«Barystyń» búgingi qarsylasy - «Dınamo»
ASTANA. 22 qarasha. QazAqparat - Qurlyqtyq hokkeı lıgasynyń bıylǵy chempıonaty aıasynda Astana qalasynyń «Barys» hokkeı klýby óz alańynda ótetin oıyndar serııasyn bastaıdy. Onyń búgingi qarsylasy - «Dınamo» (Latvııa, Rıga).
Lıga ashylǵaly beri bul eki komanda 11 ret kezdesken bolatyn. Sonyń jeti matchynda «Barystyń» mereıi ústem bolsa, tórt oıynda «Dınamonyń» joly boldy. Sońǵy ret Rıga qalasynda kezdeskende, Astana qalasynyń hokkeı klýby býllıt serııasynda 2:3 esebimen utylǵan. «Dınamo» qosymsha eki upaıǵa ıe bolyp, Qurlyqtyq hokkeı lıgasynyń jalpytýrnırlik kestesinde birneshe satyǵa kóterildi. Qazir onyń enshisinde 55 upaı bar. Sonyń arqasynda komanda 6-shy orynda tur. Al «Barys» 58 upaımen 4-shi orynda keledi.
Aıta keteıik, búgingi oıyn keshki saǵat 19:00-de Astanadaǵy «Qazaqstan» sport kesheninde bastalady. Ony «KAZsport» telearnasy tikeleı efır arqyly kórsetpek.
