«Barystyń» bas bapkeri oıynshylardyń olqylyǵyn atady
ASTANA. 25 qarasha. QazAqparat - Astana qalasynyń «Barys» hokkeı klýby óz alańynda máskeýlik «TsSKA» komandasynan utylyp qaldy.
Buǵan deıin Máskeý qalasynda ótken oıynda «Barys» bul komandaǵa 0:3 esebimen jol bergen bolatyn. Al osy joly Astana qalasynyń hokkeı klýby 2:5 bolyp utyldy. Oıynnyń birinshi kezeńinde qarsylastar eki birdeı shaıbamen alǵa shyqty. Alaıda "Barys" ekinshi kezeńde esep aıyrmasyn bir shaıbaǵa qysqarta bildi. Úshinshi kezeńniń basynda «TsSKA» tarazy basyn 1:3-ke jetkizdi. Soǵan qaramastan, «Barystyń» hokkeıshileri moıymady. Úsh mınýttyń ishinde esep ózgerdi: 2:3. Degenmen, «TsSKA»-nyń tórtinshi shaıbasy jankúıerlerdiń úmitin sý sepkendeı basty. Matchtyń sońynda «Barystyń» bas bapkeri Arı-Pekka Selın qaqpashyny alyp tastap, altynshy oıynshyny da shyǵaryp kórdi. Biraq komanda qorǵanysy syr berip, bos turǵan qaqpaǵa besinshi shaıba kirip ketti. Qorytyndy esep - 2:5. «Biz eki ádemi gol soqtyq. Alaıda bizdiń negizgi maqsatymyz - tyǵyz qorǵanysty ustaı bilý. Ony iske asyra almadyq. Kelesi kezdesýde osy olqylyqty boldyrmaýǵa tyrysamyz», - deıdi Arı-Pekka Selın.
Aıta keteıik, óz alańynda «Barys» ekinshi ret utylyp, bes upaıdan aıyrylyp otyr. Degenmen, qazirgi 59 upaımen komanda Qurlyqtyq hokkeı lıgasynyń Shyǵys konferentsııasynda ekinshi oryndy, al jalpytýrnırlik kestede tórtinshi oryndy saqtap keledi.
