«Barystyń» bas bapkeri Andreı Nazarov 6 oıynnan shettetildi - VIDEO
ASTANA. QazAqparat - Bapker úsh bap boıynsha jazaǵa tartyldy: tártipsizdik tanytýy, nárselerdi laqtyrý jáne tóreshilerge til tıgizý, tártipsiz ym-ısharattar kórsetkeni úshin. Bul tártipsizdigi qaıtalansa, odan da qatal shara qoldanylýy múmkin, dep jazady Vestı.kz.
"Bul oqıǵa jan-jaqty qaralǵan otyrys ótti. Bapker Nazarov 6 oıynnan shettetildi. Sonyń bireýi mindetti túrde bolsa, qalǵan beseýi 3 bap boıynsha", - dedi KHL vıtse-prezıdenti Dmıtrıı Kýrbatov.
"Sonymen qatar, oǵan 160 myń rýbl kóleminde aıyppul salyndy. Onymen qosa bapkerdiń jalaqysyna qarap qosymsha jeke aıyppul taǵaıyndalady. Arnaıy esep bar. Bir jyldyq jalaqy oıyn kúnderine bólinip, dıskvalıfıkatsııalanǵan merzimge kóbeıtiledi", - dep qosty Kýrbatov.
Ol budan da qatal shara qoldanýǵa bolatynyn aıtty. "Biz Aleksandr Ivanovıch Medvedevtiń (QHL basshysy), Vıacheslav Fetısovtyń pikirin bildik. Fetısov mundaıdy buryn UHL-da da, keńestik kezeńde de kórmegenin aıtty. 10-nan astam matchtan shettetilýi múmkin edi", - dedi Kýrbatov.
"Jaǵdaı qaıtalanatyn bolsa, kelesi jaza qataldaý bolady", - dep túıdi Kýrbatov.
Eske sala keteıik, Nazarov "Admıral" komandasymen oıynnyń sońynda alańnan qýyldy. Bapker Vıacheslav Fetısovty tóreshilerge qysym kórsetti dep aıyptady. Nazarov tártipsiz ym-ısharattardy jankúıerlerge emes, sol kisige kórsetkenin aıtyp aqtalýda. Bul oıynda astanalyqtar 2:3 esebimen utyldy. Qazaqstandyq klýbqa 16 mınýttyq jaza taǵaıyndaldy. 18 qyrkúıekte, qos komanda Vladıvostokta taǵy bir kezdesý ótkizedi.
