«Barys» jankúıerlerin tasymaldaýǵa avtobýs shyǵarylady
ASTANA. QazAqparat - «Astana LRT» JShS qazan aıynda «Barys» hokkeı matchtary ótkizilýine baılanysty arnaıy Shuttle-Bus avtobýstaryn shyǵarǵaly otyr. Bul týraly kompanııanyń Feısbýktegi paraqshasynda málim etildi, dep habarlaıdy QazAqparat tilshisi.
«Qurmetti qala turǵyndary men meımandary! 3, 7, 9, 22, 26, 28, 30 qazan kúnderi «Barys» hokkeı matchynyń ótkizilýine baılanysty qala kóshelerine arnaıy Shuttle-Bus avtobýstary (jetkizý jáne áketý) shyǵady. Avtobýstar «Qazaqstan» sport kesheni men Bógenbaı batyr eskertkishi (Bógenbaı batyr dańǵyly men Saryarqa kósheleriniń qıylysyndaǵy) aldyndaǵy turaqtarda bolady. Avtobýstar jumys kúnderi saǵat 18:30-de, al demalys kúnderi saǵat 16:15-de jolǵa shyǵady», - delingen habarlamada.
Shuttle - Bus avtobýstary jolaýshylardy «Barys-Arena» sport keshenine jetkizedi.
«Shuttle - Bus arnaıy avtobýstarynyń bılet quny qala ishindegi qoǵamdyq kóliktermen birdeı. Avtobýstardyń joǵaryda atalǵan ýaqytyn eskere otyryp, jolǵa shyǵýdy aldyn ala josparlap alýlaryńyzdy suraımyz», - delingen habarlamada.
