Barys VS Metallýrg: qarsylasqa taǵy bir upaıdy berip qoıdyq
ASTANA. QazAqparat - Búgin Qurlyqtyq xokkeı lıgasynyń kezekti shırek fınaldyq matchtary ótti. Astanalyq «Barys» klýby syrt alańda «Metallýrg» komandasymen kezdesti, dep xabarlaıdy QazAqparat tilshisi.
Oıynnyń birinshi kezeńinen bastap eki komanda da jyldam shaıba soǵyp, birden psıxologııalyq basymdyqqa ıe bolýǵa tyrysty. Sodan xokkeıshiler bir jaqtan ekinshi jaqqa tolqyndaı serpildi. Osyndaı bir sátte alań ıeleri «Barys» xokkeıshileriniń qarsy jaqta jınalyp qalǵanyn paıdalanyp, tanymal shabýyldaýshy Danıs Zarıpovqa shaıbany shyǵaryp berdi. Ol óz múmkindigin qalt jibergen joq. Zarıpov qaqpashymyz Henrık Karlsonmen betpe-bet shyǵyp, bir shaıba salyp ketti. Esep - 1:0.
Osydan keıin «Barys» oıynshysy Korrı Trıvıno da qarsylastyń qaqpashysymen betpe-bet shyqqan edi. Alaıda ol óz aılasyn asyra almady. Birinshi kezeńde tarazy basyn teńestiretin tamasha múmkindikter boldy. Degenmen, eki metrlik Koshechkın barlyq shaıbalardy sheber qaıtaryp otyrdy. Al ekinshi kezeńniń basynda «Barys» tarazy basyn teńestirip ketti. Roman Starchenko komandanyń san jaǵynan basymdyǵyn sheber oryndaı bildi. Alaıda ekinshi kezeńniń orta tusynda Henrık Karlson qarsylastyń yńǵaısyz soqqan shaıbasyn yrqyna kóndire almaı, qaqpanyń syzyǵynan asyryp aldy. «Metallýrg» taǵy da alǵa shyqty. Araǵa úsh mınýt salyp astanalyq klýbtyń surmergeni Naıdjel Doýs esepti 2:2-ge jetkizdi. Al Marten Sen-Per «Barystyń» basymdyǵyn ulǵaıtty.
Osylaısha, astanalyq klýbtyń xokkeıshileri bir mınýttyń ishinde Vasılıı Koshechkındi eki márte qapy qaldyryp, alǵa shyqty.
Úshinshi kezeńde «Barystyń» shabýylshysy Naıdjel Doýs erejeni buzyp, óz komandasyn bir oıynshyǵa kem quramda qorǵanýǵa májbúrledi. «Metallýrg» osy múmkindikti de qalt jibermedi. Danıs Zarıpov ekinshi shaıbasyn soqty. Kóp uzamaı, Naıdjel Doýs taǵy da erejeni buzyp, aıyp ýaqytyn óteýge attandy. Osy kezde Zarıpov xet-trıktiń avtory atandy. Esep 4:3. Degenmen, «Barystyń» kapıtany Doýs óz qateligin túzeı bildi. Machtyń aıaqtalýyna eki mınýttaı ýaqyt qalǵanda onyń sol qaptaldan soqqan shaıbasy qarsylastyń qaqpasynan tabyldy. Esep - 4:4. Overtaımda sáttilik «Metallýrg» komandasyna serik boldy. Qorytyndy esep - 5:4.
Aıta keteıik, osy oıynnan keıin «Metallýrg» jalpy esepte eki upaımen alda keledi. Buǵan deıingi matchta «Barys» 4:0 esebimen utylǵan bolatyn. Jartylaı fınalǵa ótý úshin qarsylasty tórt ret jeńý kerek.
