«Barys» syrt aıdynda Qurlyqtyq hokkeı lıgasyndaǵy azýly qarsylasyn tize búktirdi
ASTANA. 15 qańtar. QazAqparat /Rýslan Ǵabbasov/ - Búgin keshqurym «Barys» syrt aıdynda Qurlyqtyq hokkeı lıgasyndaǵy Sankt-Peterbordyń «SKA» komandasyn utty.
Atap aıtqanda, oıyn qorytyndysy boıynsha astanalyqtar 5:2 esebimen aıqyn basymdyqty kórsetti. Oıynnyń úsh kezeńinde de «Barystyń» tegeýrindi shabýylyna Sankt-Peterbordyń hokkeıshileri qarsy tura almady.
Qurlyqtyq hokkeı lıgasy aıasynda «SKA» alda kele jatyr. Lıganyń Batys konferentsııasynda ol 85 upaı jınap, týrnırlik kestede birinshi tur. Al osy jeńisten keıin «Barys» 65 upaımen Shyǵys konferentsııasynda 6 orynǵa turaqtady.
QHL-diń turaqty chempıonatynda qarsylastar 8 ret kezdesip, onyń altaýynda «SKA» jeńiske jetken edi.
Esterińizge sala keteıik, Qazaqstandaǵy saılaýǵa baılanysty «Barys» HK men Sankt-Peterbordyń «SKA» komandasy arasyndaǵy matchtyń ótkizilý orny aýystyryldy.
Atalmysh kezdesý 15 qańtarda «Qazaqstan» sport saraıynda ótýi tıis bolatyn.
15 qańtarda «Qazaqstan» sport saraıynda josparlanǵan sharalarǵa baılanysty «Barys» hokkeı klýby óz aıdynynda «SKA» komandasyn qabyldaı almady. QHL kelisimimen matchty Sankt-Peterborda ótkizý týraly sheshim qabyldandy.
Klýbtyń málim etýinshe, jankúıerlerdiń «Barys» oıynyna satyp alǵan bıletterdi kassalarǵa ótkizip, tolyq qunyn qaıtaryp alýlaryna bolady.
Eske sala keteıik, 15 qańtar kúni Qazaqstanda partııa tizimi boıynsha, QR Parlamenti Májilisiniń depýtattaryn, sonymen qatar máslıhattary depýtattaryn saılaý ótti.. «Qazaqstan» sport saraıynda Astana qalasynyń «Almaty» aýdanyna jatatyn №71 saılaý ýchaskesi ornalasqan.
«Barystyń» kelesi kezdesýi 17 jeltoqsanda óz aıdynynda Rıganyń «Dınamo» komandasymen ótedi.
