«Barys» pen «Traktor» balalar hokkeı mektebiniń komandalary joldastyq kezdesý ótkizdi (FOTO)
ASTANA. QazAqparat - Astanadaǵy Chelıabi oblysynyń (RF) kúnderi aıasynda «Barys Arena» muz stadıonynda «Barys» (Astana) pen «Traktor» (Chelıabi) balalar hokkeı mektebiniń komandalary joldastyq kezdesý ótkizdi.
Chelıabi oblysynyń gýbernatory Borıs Dýbrovskıı alańǵa shaıba tastap, matchty saltanatty túrde ashyp berdi.
Qazaqstan astanasyna sapary kezinde búgin B.Dýbrovskıı elorda ákimi Ádilbek Jaqsybekovpen kezdesti. Basqosý kezinde taraptar eki óńirdiń ınvestıtsııalyq qarym-qatynasy men túrli salalardaǵy baılanystardyń áleýetin talqylady. Chelıabi oblysynyń gýbernatory óz sózinde Astananyń túrli aýqymdaǵy sharalardy uıymdastyrýdaǵy tájirıbesi qyzyqtyratyndyǵyn atap ótti.
Matchtan soń gýbernator Beıbitshilik jáne kelisim saraıynda arnaıy fotokórmeniń ashylýyna barady jáne «Ýral» men «Ýralskıı Dıksılend» bı ansamblderiniń kontsertin tamashalaıdy dep kútilýde. Astanadaǵy Chelıabi oblysynyń (RF) kúnderi 13 sáýirge deıin jalǵasady. 
