«Barys» óz jerinde «Arystannan» jeńildi
ASTANA. 29 qarasha. QazAqparat - Astana qalasynyń «Barys» hokkeı klýby óz alańynda «Lev» (Chehııa, Praga) komandasynan utyldy.
Bul oıynda qonaqtar esepti birinshi bolyp ashty. Alaıda alǵashqy kezeńniń sońyna deıin «Barystyń» hokkeıshileri tarazy basyn teńestire bildi. Ekinshi kezeńde «Lev» taǵy da bir shaıbamen alǵa shyqty. «Barys» oǵan da jaýap berip, úshinshi kezeńde esepti teń qyldy. Alaıda kontrshabýyldyń arqasynda chehtar bir mınýttyń ishinde óz basymdyǵyn ulǵaıtty. Esep - 2:3. Ókinishke qaraı, Astana qalasynyń hokkeı klýby ony ózgerte almady. Oıyndy qosymsha ýaqytqa ulastyrýǵa tamasha múmkindikter boldy. Matchtyń sońynda «Barys» qaqpashyny alyp tastap, altynshy oıynshyny da shyǵardy. Biraq «Lev»-tyń qorǵanysyn buza almady.
Aıta keteıik, Praga hokeı klýbynyń Qurlyqtyq hokkeı lıgasyna qosylǵanyna kóp bolǵan joq. Sondyqtan osy oıynǵa deıin bul eki komanda úsh-aq ret kezdesti. Sonyń barlyǵynda «Barystyń» mereıi ústem boldy. Ótken chempıonattyń eki matchynda Astana qalasynyń hokkeı klýby 4:2 jáne 5:1 esebimen jeńiske jetse, bıylǵy chempıonat aıasynda Bratıslavada ótken matchta «Barystyń» hokkeıshileri overtaımda jeńiske jetken bolatyn. Osy joly «Barys» óz jerinde «Arystannan» alǵash ret jeńilip otyr.
