«Barys» óz aıdynynda «Torpedo» komandasynan jeńilip qaldy
NUR-SULTAN. QazAqparat – Qurlyqtyq hokkeı lıgasynyń kezekti matchynda «Barys» óz aıdynynda «Torpedo» (Nıjnıı Novgorod) komandasyn qabyldady, dep habarlaıdy QazAqparat tilshisi.
Buǵan deıin elordalyqtar sońǵy tórt kezdesýinde jeńiske jetken edi.
«Torpedo» 36 upaımen Shyǵys konferentsııasynda jetinshi orynda kele jatsa, «Barys» 33 upaımen 9-satyda turǵan-dy. Qos komandanyń da maqsaty pleı-off básekesine shyǵýǵa múmkindik beretin úzdik segizdikke iligý bolatyn.
Bul joly «Barys» úshin oıyn sátsiz bastaldy. Birinshi kezeńde 11-mınýtta aıdyn ıeleriniń oıynshy almasý kezindegi qateligin paıdalanǵan Sergeı Goncharýk esep ashty.
Matchtyń ekinshi kezeńinde S.Goncharýktyń ádemi pasynan keıin 23-mınýtta Mıhaıl Varnakov esepti 2:0-ge jetkizdi. 28-mınýtta Djastın Klýs Henrık Karlssondy qapy qaldyrdy – 3:0. Degenmen 31-mınýtta san basymdylyǵyn paıdalanǵan Fıl Barone esepti qysqartty – 1:3. 38-mınýtta F.Barone taǵy bir márte mergendik tanytty – 2:3.
Úshinshi, sheshýshi kezeńde elordalyqtar qanshama tyrysqanymen, esep ózgermeı, «Torpedo» komandasy jeńiske jetti – 3:2.
Endi elordalyqtar qatarynan tórt matchyn syrt aıdynda ótkizedi. 13 jeltoqsanda ıÝrıı Mıhaılıstiń shákirtteri Chelıabide jergilikti «Traktormen» kúsh synasady.
Foto: www.hcbarys.kz
