«Barys» óz aıdynynda Sankt-Peterbor hokkeıshilerinen oısyraı utyldy
ASTANA. QazAqparat - Qurlyqtyq hokkeı lıgasynyń (QHL) kezekti kezdesýinde Astananyń «Barysy» óz aıdynynda Sankt-Peterbordyń SKA komandasyn qabyldap, 1:4 esebimen utylyp qaldy, dep habarlaıdy «QazAqparat» tilshisi.
SKA bıylǵy maýsymda jeńilistiń dámin tatpaǵan, týrnır kestesinde jeke-dara kósh bastap kele jatqan komanda. Bul oıynda da olar aıqyn basymdylyǵyn kórsete bildi. Birinshi kezeńde Sergeı Kalının qos goldyń avtory atandy. Sodan keıin ekinshi kezeńde Patrık Herslı men Aleksandr Barabanov esepti 4:0-ge jetkizdi. Tek sońǵy kezeńde ǵana «Barystan» Kırıll Polohov esepti qysqarta aldy.
Osylaısha, bıylǵy maýsymdy sátti bastap, syrt aıdyndarda jeńiske jetken elordalyqtar «Barys-Arenadaǵy» bes kezdesýiniń tórteýinde jeńilis taýyp, Shyǵys konferentsııasynda jetinshi orynǵa syrǵydy. Evgenıı Koreshkovtyń shákirtteri kelesi oıynyn 27 qyrkúıek kúni óz aıdynynda Batys konferentsııasynda úshinshi orynda kele jatqan «Lokomotıv» (ıAroslavl) komandasymen ótkizedi.
