«Barys» óz aıdynynda «Admıraldy» utty
ASTANA. QazAqparat - Qurlyqtyq hokkeı lıgasynyń (QHL) kezekti oıynyn Astananyń «Barysy» óz aıdynynda Vladıvostoktyń «Admıral» komandasymen ótkizip, 4:3 esebimen jeńiske jetti, dep habarlaıdy «QazAqparat» tilshisi.
«Qazsport» telearnasynan tikeleı efırde kórsetkenindeı, birinshi kezeńde osyǵan deıin jaraqatyna baılanysty aıdynǵa shyǵa almaı kelgen «Barystyń» kapıtany Naıdjel Doýs 7-mınýtta esep ashyp, bıylǵy chempıonattaǵy 19-ynshy golyn soqty. Áıtse de ile-shala tártip buzǵan Anton Sagadeev aıdynnan qýylyp, muny qonaqtar sátti paıdalana bilip, kanadalyq shabýylshy Djeıms Raıt tarazy basyn teńestirdi.
Ekinshi kezeńde 32-mınýtta «Barystyń» qorǵaýshysy Maksım Semenov mergendik tanytyp, osy birinshiliktegi alǵashqy golyn soǵyp, komandasyn alǵa shyǵardy. Sodan keıin Talǵat Jaılaýov 35-mınýtta esepti 3:1-ge jetkizdi, bul onyń bıylǵy maýsymdaǵy tórtinshi goly edi. «Admıraldyń» qos birdeı hokkeıshisi aıdynnan qýylǵan sátte N.Doýs 39-mınýtta osy matchtaǵy óziniń ekinshi golyn qarsylastar qaqpasyna engizdi.
Úshinshi kezeńde 47-mınýtta qonaqtar sapyndaǵy amerıkalyq qorǵaýshy Djonaton Blýmnyń alystan baǵyttaǵan shaıbasyn «Barystyń» qaqpashysy, shvetsııalyq legıoner Henrık Larsson toıtara almady. Match bitýge úsh mınýttaı ýaqyt qalǵanda, «Admıraldan» slovenııalyq shabýylshy Robert Sabolıch esepti 4:3-ke deıin qysqartty. Budan keıin qonaqtar qaqpashysyn aýystyryp, aıdynǵa altynshy oıynshysyn shyǵarǵanymen, eshteńe bitire almady.
Osylaısha, tartysty básekede «Admıraldy» 4:3 esebimen tize búktirgen astanalyqtar 40 upaımen QHL-dyń Shyǵys konferentsııasynda úshinshi orynǵa kóterildi. Óz aıdynyndaǵy oıyndardy onsha sátti ótkizbeı júrgen «Barys» munyń aldynda «Amýr» (Habarovsk) komandasyna 1:3 esebimen ese jibergen bolatyn. Evgenıı Koreshkovtyń shákirtteri aldaǵy tórt birdeı kezdesýin syrt aıdynda ótkizip, sonyń alǵashqysynda 21 qazan kúni Nıjnıı Novgorod qalasynda jergilikti «Torpedo» komandasymen sheberlik baıqasady.
