«Barys» oıynshysy Damır Ryspaev bes oıynnan shettetildi
ASTANA. QazAqparat - Sporttyq-tártiptik komıtet 21 qańtarda bolǵan «Barys» - «Avangard» oıynynyń epızodyna qatysty sheshim shyǵardy. 35-shi mınýtta alań ıeleriniń forvardy Damır Ryspaev qonaq komandanyń qorǵaýshysy Mıhal Kempnıge shabýyl jasaǵany úshin oıynnan shyǵaryldy.
Usynylǵan materıaldardy muqııat teksergen STK Ryspaevqa qatysty erejeniń 528-taraýy 1-bólimi boıynsha jazany ózgerissiz qaldyrdy. Osylaısha qazaqstandyq hokkeıshi oıynnyń sońyna deıin (5 mın + 20 mın) alańǵa shyǵý quqyǵynan aıyryldy. Tártiptik reglamenttiń 26-baby 3.7-bólimine sáıkes Ryspaev úsh oıynnan shettetildi. Aǵymdaǵy maýsymda oıyn alańyndaǵy birqatar urystyń týýyna sebepker bolǵandyqtan, ol avtomatty túrde taǵy eki oıynnan shettetildi. Sóıtip, «Barys» forvardy bes oıynǵa qatysý quqyǵynan aıyryldy, dep jazdy Sports.kz.
