«Barys» osy maýsymdaǵy otyzynshy jeńisine qol jetkizdi
ASTANA. 15 qańtar. QazAqparat - Qazaqstandyq "Barys" Qurlyqtyq hokkeı lıgasy aıasynda Astanada máskeýlik "Spartakty" qabyldap, qarsylastaryn 4:2 esebimen tize búktirdi.
Birinshi bolyp astanalyq komanda esep ashty. Naıdjel Doýs jetinshi mınýtta Dastın Boıd bergen pasty golǵa ulastyra bildi. Ekinshi jıyrmamınýttyqta Andreı Sergeevtiń belsendiligi arqasynda qonaqtar esepti teńestire aldy. Alaıda olardyń qýanyshyn 27-mınýtta Talǵat Jaılaýov sý sepkendeı basty. Bul - onyń osy maýsymdaǵy onynshy goly. Alty mınýttan soń Doýs dýbl avtory atanyp, esepti 3:1-ge jetkizdi. Al oıynnyń 48-mınýtynda "Barystyń" jańa oıynshysy Zak Hemıll qazaqstandyq jankúıerlerdi taǵy bir qýantty. "Spartak" hokkeıshileri oıynnyń sońyna qaraı tek bir gol sala aldy. Onyń avtory - Alekseı Grıshın. Aıta keteıik, bul "Barystyń" osy maýsymdaǵy otyzynshy jeńisi.
