«Barys»-«Metallýrg» matchy: Elordalyq klýb pleı-offtyń 1/2 fınalyna óte ala ma
NUR-SULTAN. QazAqparat - Búgin elordalyq «Barys» qurlyqtyq hokkeı lıgasy pleı-off satysynyń shırek fınalynda Reseıdiń «Metallýrg» (Magnıtogorsk) komandasymen sheshýshi oıyn ótkizedi. Jeńiske jetken jaǵdaıda elordalyq klýb jartylaı fınalǵa joldama alady, dep habarlaıdy QazAqparat tilshisi.
Bıylǵy pleı-off satysynda eki komanda buǵan deıin tórt márte kezdesti. Onyń úsheýinde «Barys» jeńiske jetse, bireýinde qarsylasyna ese jiberip qoıdy. Aldymen elordada «Metallýrgti» 4:0 esebimen tize búktirse, odan keıin olarǵa 0:3 esebimen ese jiberdi. Al Magnıtogorskide «Barys» aldymen 2:1 esebimen jeńse, keıin 2:0 esebimen basym tústi. Osylaısha, oıyndar serııasynda «Barys» 3:1 esebimen alǵa shyqty. Jarys talaby boıynsha týrnırdiń atalmysh satysy komandanyń bireýi tórt jeńiske jetkenge deıin jalǵasady. Qajet bolǵan jaǵdaıda qosymsha oıyndar 11, 13 naýryz kúnderi ótkiziledi.
«Metallýrg» qurlyqtyq hokkeı lıgasynda tájirıbeli klýbtyń biri sanalady. Reseılik klýb 2013/2014, 2015/2016 jyldarda pleı-off satysynyń fınalyna deıin baryp, Gagarın kýbogyna qol jetkizdi.
Eki komanda buǵan deıin pleı-off satysynda eki márte jolyqty. 2011/2012 jylǵy kezeńde shyǵys konferentsııasynda 1/4 fınalda reseılik klýb oıyndar serııasynda 4:3 esebimen jeńiske jetip, jarysty jalǵastyrýǵa múmkindik aldy. Al 2016/2017 jylǵy kezeńde eki komanda shyǵys konferentsııasynda jartylaı fınalda jolyǵyp, oıyndar serııasynda elordalyq komanda qarsylasyna 0:4 esebimen ese jiberdi.
«Barys-Arenada» ótetin búgingi kezdesý elorda ýaqytymen 17.00-de bastalady. Oıyn «Qazsport» telearnasynan tikeleı efırde kórsetiledi.
