«Barys» máskeýlik «Spartakty» oısyrata jeńdi
ASTANA. Qańtardyń 29-y. QazAqparat /Gúlnár Jandaǵulova/ - Qurlyqtyq hokkeı lıgasynyń (KHL) turaqty chempıonatynyń kezekti matchynda astanalyq «Barys» máskeýlik «Spartakty» 9:3 esebimen oısyrata jeńip, qonaqtardy úılerine pás kóńilmen qaıtardy,
dep habarlaıdy Lıganyń resmı saıtynan.
Aıdyn ıeleri alǵashqy shabýyldan-aq esep ashty, barystyqtardan Vadım Krasnoslobodtsev kózge tústi. Biraq bir mınýttan keıin «Spartak» ta ese jibermeı, Martın Tsıbaktyń kúshimen esepti teńestirdi. Odan keıin «barystyqtar» oıyndy tolyq óz baqylaýlaryna alyp, qarsylastarynyń qaqpasyna taǵy úsh shaıba saldy. Ol shaıbalardyń avtorlary - Iozef Shtýmpel, Ilıa Solarev jáne taǵy Vadım Krasnoslobodtsev boldy. Oıynnyń ekinshi kezeńinde «Barys» taǵy eki nátıjeli shabýyl jasap, esepti 6:1-ge jetkizdi, bul joly Kevın Dallmen men Konstantın Romanov kózge tústi.
Úshinshi kezeńniń basynda «Spartak» oıynshysy ıAroslav Obshýtý «Barys» qaqpasyn baǵyndyrsa, astanalyqtar oǵan úsh golmen jaýap berdi. Shtýmpel ekinshi shaıbasyn salsa, Konstantın Glazachev pen Maksım Spırıdonov - bir-bir goldan saldy.
Oıynnyń 53-shi mınýtynda «Spartak» oıynshysy Dmıtrıı Ýper úshinshi shaıbany salyp, oıynnyń naqty esebin belgiledi.
