«Barys» máskeýlik «Dınamo» komandasyn utty
ASTANA. 7 qarasha. QazAqparat /Rýslan Ǵabbasov/ - Qurlyqtyq hokkeı lıgasy aıasynda elordadaǵy «Qazaqstan» sport saraıynda ótken keshegi oıynda «Barys» komandasy máskeýlik «Dınamodan» basym tústi.
Aıta keteıik, sońǵy 6 oıynda astanalyq komanda jeńilis tapqan bolatyn. «Dınamo» komandasymen bolǵan dodadaǵy jeńis «Barys» komandasyna týrnır kestesinde joǵary órleýge múmkindik berip otyr. Oıynnyń birinshi kezeńinde qos komanda hokkeıshileri esep ashýǵa qaýqarly bolmady. Tek ekinshi kezeńniń basynda qonaqtar shaıba salyp, basymdyqtaryn kórsete aldy. Alaıda, keshegi dodada máskeýlikter úshin bul sońǵy shaıba boldy. Sebebi, oıynnyń qalǵan ýaqytynda «Barys» komandasynyń tegeýrindi qarqyny qonaqtarǵa shaıba salýǵa múmkindik bermedi. Osy kezeńniń 11-mınýtynda astanalyq komanda esepti teńestirdi. Úshinshi kezeńde eki komanda da esepti eseleı almady. Tek, qosymsha ýaqytta ǵana «Barys» hokkeıshileri ekinshi shaıbany saldy. Sonymen, bul tartys «Barys» komandasynyń basymdyǵymen aıaqtaldy (2:1).
