«Barys» kósh sońyndaǵy komandadan utyldy - QHL
ASTANA. 21 qańtar. QazAqparat - Astanalyq "Barys" klýby Qurlyqtyq hokkeı lıgasynyń chempıonaty aıasynda óz alańynda "Dınamo" komandasyn qabyldap, 1:2 esebimen jeńilis tapty.
Eń alǵashqy goldy elordalyq ujymnyń shabýylshysy Brendon Bochenskı saldy. Ekinshi aınalymda esep ózgergen joq. Úshinshi kezeńde "Barys" jankúıerleriniń ókinishine oraı, Andreı Stasıa 48-mınýtta esepti teńestirip ketti. Negizgi ýaqyt teń aıaqtalǵannan keıin, oıyn overtaımda jalǵasyn tapty. Ol kezde qonaqtardyń joly boldy. Lýkash Kraıchektiń shaıbasy qarsylastarǵa jeńis ákeldi.
Aıta keteıik, qazaqstandyq hokkeıshiler osymen úshinshi ret jeńilistiń aşy dámin tatty. Bunyń aldynda olar "Donbass" klýbyna 2:6, horvatııalyq "Medveshchakqa" 1:3 esebimen ese jibergen. Qazirgi ýaqytta "Barys" Shyǵys konferentsııasynyń ekinshi ornynda keledi, al "Dınamo" bolsa, Batys konferentsııasynyń eń sońǵy satysyna jaıǵasqan.
