«Barys» komandasy rıgalyq «Dınamo» hokkeıshilerinen basym tústi
ASTANA. Tamyzdyń 12-si. QazAqparat - QR Prezıdenti kýbogi týrnıriniń ekinshi aınalymynda «Barys» komandasy rıgalyq «Dınamo» hokkeıshilerin 4:2 esebimen utty.
Alaıda, oıyndaǵy esepti «Dınamo» oıynshylary ashty. «Barys» qaqpasyna shaıbany 15 mınýtta Djerınsh salǵan bolatyn. Astanalyqtardyń qataryndaǵy Vadım Krasnoslobodtsev ekinshi kezeńde esepti teńestirip, oıyndy qyzdyra tústi. Osy týrnırde erekshe kózge túsip júrgen qazaqstandyq hokkeıshi Talǵat Jaılaýov 39 mınýtta gol salyp, osy týrnırdegi alǵashqy shaıbasyn óz enshisine jazdy. T. Jaılaýovtyń 3-shi kezeńde soqqan taǵy bir goly «Barys» komandasynyń basymdyǵyn kúsheıtti.
Kóp uzamaı, kezdesýdiń 49-shy mınýtynda «Dınamolyqtardyń» qaqpasyna 4-shi gol kirdi. Shaıba avtory Irjı Novotny.
Oıyn aıaqtalýǵa jaqyn qalǵanda «Dınamo» oıynshylarynyń shabýylyn tyıym salynǵan ádispen toqtatqany úshin astanalyqtardyń qaqpasyna býllıt belgilendi. Rıgalyqtardyń qataryndaǵy shabýylshy Darzınsh bul múmkindikti múlt jibergen joq. Oıyn 4:2 esebimen aıaqtaldy.
Bul kezdesýden erterek, mınskilik «Dınamo» komandasy men Máskeý oblysynyń «Atlant» komandalarynyń joly túıisken bolatyn. reseılik hokkeıshiler «Dınamo» komandasynan jeńilip qaldy. Esep - 6:3.
Kýbok dodasynyń ekinshi aınalymyndaǵy jeńisiniń arqasynda «Barys» komandasy týrınır kestesiniń birinshi satysyna jaıǵasty (6 upaı). Mınskiniń «Dınamosy» 4 upaımen ekinshi orynda tur. Rıga qalasynyń «Dınamo» hokkeı klýbynda 3 upaı bar. Al Máskeý oblysynyń «Atlant» klýby ázirshe birde bir upaı jınaı almaı, sońǵy orynda qalyp otyr.
QR Prezıdentiniń kýbogi jolyndaǵy jarystyń 3-shi kezeńi erteń, tamyzdyń 13-i kúni ótedi. «Barys» komandasynyń joly Mınskiniń «Dınamo» hokkeıshilerimen túıisse, Latvııanyń «Dınamo» oıynshylary «Atlant» komandasyna qarsy oınaıdy.
