«Barys» komandasy Prezıdent Kýbogyn jeńip aldy

Elordada shaıbaly hokkeıden ótken halyqaralyq týrnırdiń fınalynda jergilikti komanda reseılik «Admıral» hokkeıshilerimen kezdesip, 3:2 esebimen basym tústi, dep habarlaıdy 24.kz.

Básekeniń birinshi kezeńi teń dárejede ótti. Al ekinshi 20 mınýttyqta 4 birdeı shaıba soǵyldy. Aldymen «Barys» shabýylshysy Brendon Bochenskı qaqpaǵa dál soqqy baǵyttap, esep ashty. Biraq birneshe mınýttan soń «Admıral» hokkeıshisi mergendigimen tanyldy.

Kezeńniń sońyna deıin astanalyq Evgenıı Rymorev pen reseılik Konstantın Makarovtardyń qanjyǵasy maılandy. Úshinshi kezeńde esep ózgermedi. Al qosymsha ýaqytta «Barys» oıynshylary jeńis shaıbasyn soqty. Roman Starchenko Talǵat Jaılaýovtan alǵan nátıjeli pasyn golǵa aınaldyrdy. Sóıtip, «Barys» bıylǵy jarystyń jeńimpazy atandy.