«Barys» QHL-dyń eń myqty klýbtarynyń birin talqandady
ASTANA. 22 qarasha. QazAqparat - Astanalyq «Barys» syrt alańda chelıabilik «Traktor» komandasyn oısyra utty.
Match 0:3 esebimen aıaqtaldy. Bul týraly Qurlyqtyq hokkeı lıgasynyń resmı saıtynda habarlandy. Oıyn barysynda Roman Starchenko, Dmıtrıı Ýpper jáne Naıdjel Doýs óz esepterine bir-bir upaıdan jazdy.
Qazaqstandyq hokkeıshilerdiń Shyǵys konferentsııasy kóshbasshylaryn jeńetinine tolyq senim bolmady. Sebebi Vladımır Krıkýnovtyń shákirtteri bir apta buryn ǵana osy «Traktor» komandasynan 3:6 esebimen jeńilip qalǵan bolatyn.
«Barys» komandasy óziniń Qurlyqtyq hokkeı lıgasynyń chempıonatynda kezekti oıynyn erteń, Magnıtogorskide jergilikti «Metallýrg» komandasyna qarsy ótkizedi. Qazirgi ýaqytta bizdiń komanda QHL-dyń Shyǵys konferentsııasynda 8-shi orynǵa ıe bolyp otyr.
