«Barys» qatarynan tórtinshi márte jeńilip qaldy

ASTANA. QazAqparat - Qazaqstandyq «Barys» komandasy Qurlyqtyq hokkeı lıgasyndaǵy tórtinshi oıynyn Reseıde «Avangard» (Omby) komandasyna qarsy ótkizdi, dep habarlaıdy QazAqparat tilshisi.

Kezdesý barysynda komandalar tartysty oıyn ótkizdi. Birinshi kezeńde esep ashylatyn biraz múmkindik bolǵan edi. Degenmen, ony hokkeıshiler óz maqsatyna paıdalana alǵan joq.

Ekinshi kezeńde de qos komanda gol soǵatyn múmkindikti izdedi. Oıynnyń 21-mınýtynda «Barys» hokkeıshisi Nelson Noje kózdegen nysanadan múlt ketken joq. Oǵan 35-mınýtta «Avangard» hokkeıshisi Igor Geraskın bir golmen jaýap qaıyrsa, 50-mınýtta Lıbor Shýlak esepti ústemeleı tústi.

Al reseılik klýbtan Vladımır Tkachev 54, Raıan Spýner 59-mınýtta taǵy eki shaıba soǵyp ketti.

Osylaısha «Barys» qarsylasyna 1:4 esebimen ese jiberdi.

Eske salsaq, elordalyq klýb Qurlyqtyq hokkeı lıgasyndaǵy budan burynǵy úsh kezdesýinde de qarsylastaryna ese jiberdi.

Saldarynan qazaqstandyq komanda qatarynan tórtinshi márte jeńilistiń aşy dámin tatty.

Endi elordalyq klýb 11 qyrkúıekte syrt aıdynda reseılik «Dınamo» (Máskeý) klýbtarymen sheberlik baıqasady.

Al elordada 16 qyrkúıekte Reseıdiń «Admıral», 18 qyrkúıekte «Neftehımık» komandalaryn qabyldaıdy.