«Barys» hokkeıshisi qytaılyq komandany muz aıdynynda qýyp júrip sabady (FOTO)
ASTANA. QazAqparat Qurlyqtyq hokkeı lıgasyna endi qosylǵan "Kýnlýn Red Star" komandasy Astanada QR Prezıdenti Kýbogi jolyndaǵy jarysta «Barys» komandasyna qarsy oınaýdan bas tartty.
Beıjińnen kelgen hokkeıshiler men jergilikti «Barys» arasyndaǵy kezdesý jappaı tóbelesten bastaldy. Saldarynan «Barys» klýbynyń eki hokkeıshisi Damır Ryspaev pen Madııar Ibraıbekov macht sońyna deıin shettetildi. Óz kezeginde, tóbeleste qatty soqqy jegen qytaılyq "Kýnlýn Red Star" komandasyna machty ary qaraı jalǵastyrýdan bas tartqany úshin 5:0 esebimen jeńilis jazyldy.
Osylaısha, astanalyqtar Dastın Boıd úshin ese qaıtarǵanǵa uqsaıdy. Este bolsa, 5 tamyzda «Barys» komandasynyń shabýylshysy Dastın Boıd "Kýnlýn Red Star" hokkeıshilerine qarsy bolǵan oıynda aıaǵyn syndyryp alǵan bolatyn. Sol oıynda dórekilikpen erekshe kózge túsken qytaılyqtar jeńiske de jetken edi. Osynyń kesirinen «Barystyń» 41-shi nómirli oıynshysy 4 aıǵa deıin jarys jolynan shyǵyp qaldy.
