«Barys» hokkeıshisi Qazaqstan azamattyǵynan aıyryldy
Shaıba.kz saıtynan málim bolǵanyndaı, «Barys» hokkeı klýby men Qazaqstan quramasynyń shabýylshysy Dmıtrıı Shevchenko jeltoqsan aıynyń basynda astanalyq komandaǵa qaıta oralǵannan keıin Qazaqstan azamattyǵynan aıyrylǵan.
Jazda «Barys» basshylyǵyn ornynan bosatýdy talap etip, petıtsııa uıymdastyrǵan jankúıerlerdiń belsendi toby QR ІІM Astana polıtsııa departamenti kóshi-qon basqarmasyna Dmıtrıı Edýardovıch Shevchenkonyń (1995 jyly 15 jeltoqsanda týǵan, týǵan jeri – Şekıno qalasy, Týla oblysy, Reseı Federatsııasy, jumys isteıtin jeri – «Barys» hokkeı klýby) qos azamattyǵyn tekserý jóninde júgingen. Ótinishte sportshynyń Qazaqstan zańnamasyna qaıshy keletin qos azamattyǵy bar ekendigi týraly dálelder keltirilgen.
Tekserý barysynda Qazaqstan azamaty Dmıtrıı Shevchenkonyń sheteldik memlekettiń (Reseı Federatsııasy) azamaty ekendigi anyqtaldy. «Qazaqstan azamattyǵy týraly» QR Zańynyń 21-baby 5-tarmaǵyna sáıkes bıylǵy 6 jeltoqsanda Dmıtrıı Shevchenkonyń Qazaqstan azamattyǵy joıyldy dep tirkeldi.
Azamattyǵy joq hokkeıshi Qazaqstan quramasy sapynda halyqaralyq jarystarda oınaı almaıdy. Jankúıerlerdiń belsendi toby Shaıba.kz saıtyna Qazaqstan azamaty bola tura, burynǵy azamattyǵynan bas tartpaǵan «Barys» pen el quramasynyń basqa da oıynshylaryna qatysty tekserý jóninde sondaı ótinishter joldaıtynyn habarlaǵan.
Astana polıtsııa departamenti kóshi-qon basqarmasynyń resmı jaýaby elektrondy kúıinde atalǵan saıtqa túsken. Tómende skrınshot retinde berildi.
Foto: shaiba.kz