«Barys» hokkeı klýby úshin jańa muz saraıy Astananyń bıýdjeti esebinen salynbaıdy - I.Tasmaǵambetov
TANA. 19 qazan. QazAqparat /Gúlmıra Alıakparova/ - «Barys» hokkeı klýby úshin jańa muz saraıy Astananyń bıýdjeti esebinen salynbaıdy.
Bul týraly óziniń jeke blogynda turǵyndardyń saýalyna jaýap bergen elorda ákimi Imanǵalı Tasmaǵambetov málim etti.
Bektas Syzdyqov «Barys» hokkeı klýbyna jańa muz aıdynyn jasap berý máselesine qatysty ákimniń blogyna birneshe márte hat jazǵan.
«Aǵymdaǵy jyly Kontınentaldy hokkeı lıgasynyń komıssııasy «Qazaqstan» sport saraıy KHL-dyń talaptaryna sáıkes kelmeıtindigin aıtyp, lıganyń eń nashar sport nysany dep tanydy. Osyǵan oraı, Qazaqstannyń atynan shyǵyp júrgen jalǵyz hokkeı klýby - «Barys» KHL-dan shyǵyp qalýdyń az-aq aldynda tur. Astanada halyqaralyq zamanaýı talaptarǵa jaýap beretin hokkeı alańy salynady ma? Salynsa, onyń qurylysy qashan jáne qaı jerge josparlanyp otyrǵanyn aıtsańyz», - degen ol.
Ákimniń sport janashyryna bergen jaýaby mynadaı boldy: «Barys» HK úshin jańa muz alańyn salý jáne ony qarjylandyrý kózin anyqtaý respýblıkalyq deńgeıde sheshilýi tıis. Sebebi Astana qalasynyń bıýdjetinde shyǵyndardyń mundaı baby qarastyrylmaǵan. Sondyqtan tap búgin atalmysh nysannyń ornalasatyn orny men ony merzimi jaıynda aıtý erte».
