«Barys» HK prezıdenti V.Shaqshaqbaev ınternettegi jankúıerlerdiń tym qatty aıtylǵan syndaryna narazy
ASTANA. 2 tamyz. QazAqparat - «Barys» hokkeı klýbynyń prezıdenti Vadım Shaqshaqbaev ınternettegi jankúıerlerdiń pikirlerin belsendi túrde baqylap otyrady.
Bul týraly búgin ol Astanada ótken baspasóz máslıhatynda málim etti.
«Men keshe ınternettegi pikirlerdi jiti oqyp shyqtym. Ondaǵy keıbir jankúıerlerdiń aıtqany tipti aqylǵa syımaıdy. Ár túrli nárselerdi salystyryp, túsiniksiz dáleldemeler keltirip, túrli jańalyqtardy jazady», - dedi ol qynjylyp. Onyń aıtýynsha, ol jaqynda jankúıerlermen kezdesý ótkizip, olardy mazalaǵan barlyq daýly máselelerdi túsindirgen, saýaldaryna jaýap bergen.
Aıta keteıik, jankúıerlerdiń deni «Barys» hokkeı klýbynan chehııalyq legıonerlerdiń alastatylýyn qup kórmeı, narazylyq tanytqan bolatyn. Qazaqstandyq jankúıerlerdiń súıiktisi Irjı Novotnymen kelisimshartty merziminen buryn úzgen kezde bul syn órshı tústi. Qazaqstandyq BAQ quraldaryna bergen suhbatynda Irjı «Barys» klýbyna ókpeli ekendigin málim etken. Osy komandada óner kórsetken jyldardyń ishinde ol Astana men Qazaqstandy jaqsy kórip ketken.
«Munda qandaı ókpe-naz týraly aıtýǵa bolady? I. Novotny kelisimshartqa qol qoıarda, eki tarapta da ony merziminen buryn toqtatý quqyqtary baryn bildi. Jáne bul eki taraptyń arasynda bolatyn qalypty jaǵdaı. Biz komanda ózge úlgide bolýy kerek degen sheshimge keldik. I.Novotnymen biz jyly qoshtastyq», - dedi sóz sońynda klýb prezıdenti.
