«BARYS GENERATION»: Qazaqstanda hokkeı týraly jańa serıal jaryq kórdi
NUR-SULTAN. QazAqparat – «Habar» telearnasynda otandyq hokkeı sporty týraly alǵashqy «Barys GENERATION» motıvatsııalyq serıaly kórermenge jol tartty, dep habarlaıdy QazAqparat.
Jańa telejoba kún saıyn saǵat 22:30-da «Habar» telearnasynan kórsetiledi.
Teletýyndynyń 15 bóliminde kórermender hokkeı álemimen tanysyp, komandaǵa jankúıer bola alady.
«Habar» agenttigi sportty árdaıym qoldap keledi. Bizdiń telearnada sport álemindegi eń mańyzdy oqıǵalardyń translıatsııasyn ótkizý dástúrge aınalǵan. Qyzmetkerlerimiz arasynda da sporttyq mádenıet qalyptastyrýǵa kóp kóńil bólemiz. Jeltoqsan aıynda kórermenderge qazaqstandyq hokkeıdiń jetistikteri men buqaralyq sportty nasıhattaýǵa arnalǵan jańa telehıkaıa jol tartady. Bul joba otandyq sportqa qyzyǵýshylyqty arttyryp, bizdiń hokkeı komandamyzdyń ımıdjin nyǵaıtatynyna senimdimin», - dedi «Habar agenttigi» AQ Basqarma tóraǵasy Erlan Bekhojın.
Telehıkaıa sıýjeti boıynsha jastar hokkeı lıgasynan shyǵyp keteıin dep turǵan jas klýbtyń bas jattyqtyrýshysy retinde QHL oıynshysy Baýyrjan Esmuratov taǵaıyndalady. Ol komandany biriktirip, jeńiske jetkizýi tıis.
Serıalǵa Ǵazret Erjanov, Ǵanı Quljanov, Darına Menısova, Álisher Ismaılov syndy akterler túsken. Túsirilimge daıyndyq aıasynda akterler úsh aı boıy «Barys» hokkeı klýbynyń jattyqtyrýshylarynyń baqylaýynda arnaıy oqýdan ótken.
