«BARYS GENERATION» - Qazaqstanda hokkeı týraly jańa serıal jaryq kórdi
Jańa telejoba kún saıyn saǵat 22:30-da «Habar» telearnasynan kórsetiledi.
Teletýyndynyń 15 bóliminde kórermender hokkeı álemimen tanysyp, komandaǵa jankúıer bola alady.
«Habar» agenttigi sportty árdaıym qoldap keledi. Bizdiń telearnada sport álemindegi eń mańyzdy oqıǵalardyń translıatsııasyn ótkizý dástúrge aınalǵan. Qyzmetkerlerimiz arasynda da sporttyq mádenıet qalyptastyrýǵa kóp kóńil bólemiz. Jeltoqsan aıynda kórermenderge qazaqstandyq hokkeıdiń jetistikteri men buqaralyq sportty nasıhattaýǵa arnalǵan jańa telehıkaıa jol tartady. Bul joba otandyq sportqa qyzyǵýshylyqty arttyryp, bizdiń hokkeı komandamyzdyń ımıdjin nyǵaıtatynyna senimdimin», - dedi «Habar agenttigi» AQ Basqarma tóraǵasy Erlan Bekhojın.
Hokkeı - eń ádemi jáne kúrdeli sport túrleriniń biri. Munda kúsh, eptilik, reaktsııa jyldamdyǵy qajet. Komandalyq oıynnyń kúrdeliligi men sulýlyǵyn baǵalaı alatyn jankúıerlerdiń qataryn kóbeıtýge arnalǵan «Barys Generation» telehıkaıasynyń sıýjet jelisine alaýlaǵan albyrt sezim, úıishilik kıkiljiń, sporttaǵy shıelenis pen jas bapkerdiń tulǵalyq ósýi arqaý boldy.
Telehıkaıa sıýjeti boıynsha jastar hokkeı lıgasynan shyǵyp keteıin dep turǵan jas klýbtyń bas jattyqtyrýshysy retinde QHL oıynshysy Baýyrjan Esmuratov taǵaıyndalady. Ol komandany biriktirip, jeńiske jetkizýi tıis.
Óz kezeginde «Barys GENERATION» serıalynyń kreatıvti prodıýseri Sábıt Rahymbaev serıal túsirý ıdeıasy qalaı týyndaǵanyn aıtyp berdi.
«Barshamyzǵa belgili, bıyl Qazaqstannyń hokkeı quramasy álem chempıonatynda óte jaqsy oıyn kórsetti. Bul Qazaqstannyń ǵana emes, álemniń jeńisti sáti boldy. Búkil álem Qazaqstanda da hokkeı bar ekenin bildi. Sol sebepti, hokkeıshiler týraly motıvatsııalyq serıal túsirýdi uıǵardyq. Jáne menińshe, óte sátti joba shyqqan sekildi. Qyzyqty, sportqa toly jáne eń bastysy shabyt beredi. Munda barlyq aýdıtorııany qamtýǵa tyrystyq, 12 jastan bastap barlyq kórermen tamashalaı alady. Túsirilim jumystary 2 aıdan astam ýaqyt boıy Nur-Sultanda, Almatyda jáne ózge de qalalarda túsirildi», - dedi S. Rahymbaev «Barys GENERATION» serıalynyń resmı tanystyrylymynda.
Sonymen birge, QR Aqparat jáne qoǵamdyq damý mınıstriniń orynbasary Kemelbek Oıshybaev elimizde serıal óndirý isi jaqsy damyp kele jatqanyn aıtty.
«Jyl saıyn Qazaqstanda mınıstrlik tapsyrysymen 50 shaqty serıal jasalady. Sońǵy bes jylda 252 serıal túsirilgen, onyń bári Qazaqstannyń osy baǵytqa kóp kóńil bóletinin bildiredi. Jalpy teledıdardyń, ásirese serıaldardyń jastardy tárbıeleýge áseri óte mol. Osy baǵytta memleket árıne, qoldaýyn jalǵastyrady. Bıyl tarıhı baǵytta, óz tulǵalarymyz týraly, álemýettik máselelerdi kórsetetin, buqaralyq sportty nasıhattaıtyn, tálim-tárıbege baǵyttalǵan serıaldar kóptep túsirilýde.
«Barys GENERATION» serıaly da buqaralyq sportty nasıhattaıtyn jobalardyń biri. Bárimizge málim, ásirese pandemııa kezinde jalpy densaýlyqqa kúsh-qýat qosý úshin sporttyń mańyzdy ekenin bári túsindi. Sondyqtan, sportpen aınalysýdy jastarǵa nasıhattaý óte mańyzdy», - dedi K. Oıshybaev.
Hokkeı týraly hıkaıa túsirilimine kópke áli tanyla qoımaǵan akterlar men kásibı hokkeıshiler qatysty. Olardyń qatarynda Ǵazret Erjanov, Ǵanı Quljanov, Darına Menısova, Álisher Ismaılov, Aldııar Qýanyshev, Aıdana Qasymhan, Aqjol Sábıǵat, Roman Leontev, Nıkıta Garshın, Bekzat Dostanov, Arelana Amangeldıeva, Shah-Murat Ordabaev, Asylbek Qapaev, Evgenıı Shvornev bar. Túsirilimge daıyndyq aıasynda akterler úsh aı boıy «Barys» hokkeı klýbynyń jattyqtyrýshylarynyń baqylaýynda arnaıy oqýdan ótken.
«Men buǵan deıin de sportpen aınalysatynmyn, biraq komandalyq túri emes edi. Negizi kúres, jekpe-jek degen sııaqty sportqa áýes bolatynmyn. Shynyn aıtý kerek, qıyn boldy. Basynda tipten qınaldym. Hokkeıshi jigitter kóp kómektesti. Birden túsirilim bastalǵan kezde, hokkeıshige aınalýlaryń kerek dedi. Rejısser birden hokkeı oıynshysy bol degende, amalsyz hokkeı oınap ketýge týra keledi», - dedi kınoındýstrııaǵa jańadan aıaq basqan Álisher Ismaılov.
Aıta keteıik, serıaldyń qoıýshy rejısseri – Aqan Musaqulov. Ideıa avtorlary: Dáýit Shaıhıslamov, Málik Hasenov, Sanat Shapashov, Sábıt Rahymbaev jáne Bahtıer Ysqaqov.