«Barys» elordada «Salavat ıÝlaevtan» basym tústi

ASTANA. QazAqparat - «Barys» Qurlyqtyq hokkeı lıgasyndaǵy kezekti oıynyn búgin elordada Reseıdiń «Salavat ıÝlaev» (Ýfa) komandasyna qarsy ótkizdi, dep habarlaıdy QazAqparat tilshisi.

Kezdesý barysynda qos komanda tarapynan gol soǵatyn múmkindikter az bolǵan joq. Alaıda alǵashqy eki kezeńde nebári bir ǵana shaıba soǵyldy.

Ony 12-mınýtta reseılik Aleksandr Kadeıkın óziniń enshisine jazdy. Ol áriptesi Pavel Koledovtiń bergen pasyn paıdalana bildi.

Ekinshi kezeńde «Barys» komandasy tarazy basyn teńestirýge umtylǵan edi. Degenmen tablodaǵy esep ózgerissiz qaldy.

Úshinshi kezeńniń aıaq shenine taman qazaqstandyq klýb qatarynan eki shaıba soǵyp ketti.

Aldymen 56-mınýtta Arkadıı Shestakov gol soqsa, Egor Petýhov 59-mınýtta jeńis shaıbasynyń avtory atandy.

Osylaısha «Barys» qarsylasynan 2:1 esebimen basym tústi.

Eske salsaq, budan buryn «Barys» «Avtomobılısten» jeńilip qaldy.