«Barys» elordada Belarýstiń «Dınamo» komandasyna ese jiberdi

ASTANA. QazAqparat – «Barys» Qurlyqtyq hokkeı lıgasyndaǵy kezekti oıynyn búgin elordada Belarýstiń «Dınamo» (Mınsk) komandasyna qarsy ótkizdi, dep habarlaıdy QazAqparat tilshisi.

Oıynnyń birinshi kezeńinde komandalar bir-biriniń qaqpasy mańynda jıi shabýyl uıymdastyrdy.

Gol soǵatyn múmkindik izdedi. Degenmen tablodaǵy esep ózgerissiz qaldy.

Ekinshi kezeńde belarýstik klýb hokkeıshileri qatarynan úsh gol soǵyp ketti. Ony Raıan Spýner 21, Nık Merklı 31, Roman Gorbýnov 32-mınýtta óziniń enshisine jazdy.

Oǵan «Barys» hokkeıshisi Nıkıta Mıhaılıs 35-mınýtta bir shaıbamen jaýap qaıyrdy.

Úshinshi kezeńde elordalyq klýbtan Lıden Veı 42-mınýtta esep aıyrmasyn qysqartty. Degenmen odan keıin Raıan Spýner 50-mınýtta taǵy bir goldyń avtory atansa, Roman Gorbýnov 58-mınýtta qorytyndy esepti belgiledi.

Osylaısha «Barys» qarsylasyna 2:5 esebimen ese jiberdi.

Endi elordalyq klýb 18 aqpanda Qytaıdyń «Kýnlýn Red Star» komandasyna qarsy ótkizedi.

Eske salsaq, budan buryn «Barys» elordada SKA komandasynan jeńilip qalǵan edi.

Foto: sports.kz