«Barys» bizge múmkindik berdi - «Sıbır» quramasynyń bas bapkeri
ASTANA. 14 jeltoqsan. QazAqparat - Astana qalasynyń «Barys» hokkeı klýby óz alańynda «Sıbır» (Reseı, Novosıbırsk) komandasyna jol berip qoıdy.
Oıynnyń birinshi kezeńinde «Barystyń» hokkeıshileri qarsylastyń qaqpasyna eki shaıba salsa, ekinshi kezeńniń ortasynda óz basymdyǵyn 3:0-ge deıin jetkize bildi. Alaıda úshinshi kezeńde esep teńesti. Al matchtyń aıaqtalýyna bes mınýttaı ýaqyt qalǵanda, «Sıbır» taǵy bir shaıbany soǵyp, alǵa shyqty. Qorytyndy esep - 3:4.
«Sıbır» hokkeı klýbynyń bas bapkeri Dmıtrıı Kvartalnovtyń aıtýynsha, bul oıynda «Barys» Novosıbırsk quramasyna jeńýge múmkindik berdi. «Iá, biz uzaq ýaqyt boıy jeńiske qol jetkize almaı keldik. Osy jolǵy oıynda da 0:3 esebimen bastadyq. Menińshe, «Barys» komandasy jeńýge múmkindik berdi. Al bizdiń hokkeıshiler ol múmkindikti qalt jibermedi. Men jigitterge shyn alǵysymdy bildiremin. Sebebi bul jeńis bizge aýadaı qajet boldy», - deıdi D.Kvartalnov.
Aıta keteıik, bul oıynnan keıin Qurlyqtyq hokkeı lıgasynyń jalpytýrnırlik kestesinde «Barys» (73 upaı) 4-shi orynǵa tússe, «Sıbır» 58 upaımen 13-shy orynǵa kóterildi. Osynyń arqasynda ol pleı-offqa ótýi ábden múmkin.
