«Barys» bapkeri qytaılyq «Kýnlýn Red Starmen» bolǵan match týraly pikirimen bólisti

«Match óte qyzýqandy boldy. Jankúıerler tolyqqandy úsh kezeńniń oınyn kóre almaǵanyna ókinish bildiremin. Qarsylas muz alańynan ketýdi sheshti, bul - onyń quqyǵy. Degenmen kez kelgen jankúıer sporttyq arenaǵa ne úshin keledi - sony ala aldy dep sanaımyn. Bul - shoý, adrenalın, emotsııalar. Trıbýnada Dastın Boıdty qoldaıtyn plakattardy kórdik, ol sońǵy oıynda qytaılyq «Kýnlýn Red Starmen» bolǵan matchta aýyr jaraqat alyp, jarys jolynan shyǵyp qalǵan bolatyn, qoldaýlaryńyzǵa rahmet. Múmkin jigitter sony kórip, rýhtanyp ketti me, kim biledi... solaı bolady. Bul erlerdiń qatań sporty. Klýb menedjerleri aıtyp otyr maǵan, eger matchtan jankúıerler lázzat ala almaǵan bolsa, kelesi kezdesýge bıletterin aýystyryp alýlaryna bolady», - dedi A.Nazarov.

Bıletti qaıtarýǵa nıet tanytqan kez kelgen jankúıer ony úsh kúnniń ishinde «QR Prezıdenti kýboginiń basqa da kezdesýlerine almastyra alady.

Aıta keteıik, búgin «Kýnlýn Red Star» komandasy Astanada QR Prezıdenti Kýbogi jolyndaǵy jarysta «Barys» komandasynan ońbaı taıaq jedi. Saldarynan «Barys» klýbynyń eki hokkeıshisi Damır Ryspaev pen Madııar Ibraıbekov macht sońyna deıin shettetildi. Óz kezeginde, tóbeleste qatty soqqy jegen qytaılyq «Kýnlýn Red Star» komandasyna machty ary qaraı jalǵastyrýdan bas tartty jáne sol úshin olarǵa 5:0 esebimen jeńilis jazyldy.

Osylaısha, astanalyqtar Dastın Boıd úshin ese qaıtardy. Este bolsa, 5 tamyzda «Barys» komandasynyń shabýylshysy Dastın Boıd «Kýnlýn Red Star» hokkeıshilerine qarsy bolǵan oıynda aıaǵyn syndyryp alǵan bolatyn. Sol oıynda dórekilikpen erekshe kózge túsken qytaılyqtar jeńiske de jetken edi. Osynyń kesirinen «Barystyń» 41-shi nómirli oıynshysy 4 aıǵa deıin jarys jolynan shyǵyp qaldy.