«Barys» alǵash ret Eýropanyń úzdik on klýby qataryna ilikti
NUR-SULTAN. QazAqparat - Hockeyarchives.info saıty osy maýsymnyń qorytyndysy boıynsha Eýropanyń úzdik 250 klýbynyń dástúrli reıtıngin usyndy. Oǵan Qazaqstan ókilderi de kirdi, dep habarlaıdy QazAqparat Sports.kz-ke silteme jasap.
«Barys» ótken jylmen salystyrǵanda on oryn joǵary kóterilip, toǵyzynshy oryndy ıelendi jáne osy tizimniń TOP-10-na kirgen tarıhtaǵy alǵashqy Qazaqstan klýby atandy. «Saryarqa» 171-shi orynda bolsa, «Torpedo» —181-shi, «Arlan» — 201-shi, «Ertis» — 216-shy, «Almaty» —221-shi, «Beıbarys» —234-shi orynda tur.
Máskeýlik TsSKA shvedtik «Lýleo» komandasyn basyp ozyp, reıtıngte kósh bastap tur. Alǵashqy úshtikti qazandyq «Ak Bars» tuıyqtady.
Eske salaıyq, ótken maýsymda «Barys» Gagarın kýbogynyń shırek fınalyna shyǵyp, novosibirlik «Sıbır» komandasymen oınaýy tıis edi. Alaıda, elordalyq klýb elimizde engizilgen TJ rejımine baılanysty QHL pleı-off oıynynan shyǵýǵa týra keldi.
