Barynsha belsendi, bastamashyl Parlamentti kóremiz dep úmittenemin – Erkin Tuqymov

ASTANA. QazAqparat – Bir mandatty depýtattar Májilis saılaýynda shıelenisti arttyryp, qyzdyra túsedi. Mundaı pikirdi QR Prezıdenti janyndaǵy Qazaqstannyń strategııalyq zertteýler ınstıtýtynyń dırektory Erkin Tuqymov bildirdi, dep habarlaıdy QazAqparat tilshisi.

«Bir mandatty depýtattar saılaýda shıelenisti arttyryp, qyzdyra túseri sózsiz. Jańa Parlament shyn máninde bıliktiń ókildik organyna aınalady dep senemin. Onyń alańynda búkil qoǵam úshin mańyzy bar máseleler kóteriletin bolady», - dedi Erkim Tuqymov agenttik tilshisine telefon arqyly bergen pikirinde.

Sonymen qatar ol saılaý qorytyndysynda múldem jańa Parlament kóretindigine úmit artatynyn basa aıtty.

«Saılaý nátıjesinde múldem basqa, barynsha belsendi, bastamashyl Parlamentti kóremiz dep úmittenemin. Parlamentte qyzý pikirtalas pen pikirsaıys júrýi tıis. Cherchıll de «Kóshege qaraǵanda Parlamentte tóbeles pen kúrestiń bolǵany jaqsy» dep tegin aıtpasa kerek. Mundaı Parlament bıliktiń basty tarmaǵy retindegi onyń róli men mańyzyn arttyrý úshin jaǵdaı jasaıdy», - dedi ınstıtýt basshysy.

Foto: kisi.kz