Barymtashylar Nur-Sultanda asyl tuqymdy jylqylardy urlap, satýǵa soıǵan
NUR-SULTAN. QazAqparat – Nur-Sultan qalasynda barymtashylar asyl tuqymdy eki jylqyny urlap, soıyp, satýǵa jóneltken, dep habarlaıdy QazAqparat tilshisi.
«15 qańtar kúni belgisiz bireýler elorda turǵynynan jalpy quny 4,2 mln teńge bolatyn asyl tuqymdy eki jylqyny qoldy qylǵan. Maly urlanǵan otbasy báıgege shabatyn attardy baptaýmen aınalysqan», - dep habarlaıdy qalalyq Polıtsııa departamentinen.
Barymtashylar qoranyń qulpyn buzyp kirgeni anyqtalǵan. Olar jylqylardy adam qarasy joq jerge shyǵaryp, keıin baýyzdap, etin kórshi oblysqa satýǵa jóneltken.
«Mal urlyǵyn jasaǵannan keıin basqa memlekette tirkelgen «Toıota» markaly avtokólikpen izderin sýytqan. Bul jaǵdaı polıtseılerdiń jumysyn edáýir kúrdelendirip jiberdi. Alaıda, izkesýshiler barymtashylardyń izine túsip, olardy Almaty qalasynan ustady», - dep málim etti vedomstvodan.
Ustalǵandardyń biri kórshi oblystaǵy osyndaı qylmysqa qatysy bar dep kúdikke ilinip otyr. Atalǵan fakti boıynsha QR Qylmystyq kodeksiniń 188-baby 1-bóligi boıynsha sotqa deıingi tergeý amaldary júrgizilip jatyr. Kúdiktiler ýaqytsha oqshaýlaǵyshqa qamalǵan.
